Ele Zimbabwe, namhlanje limanyene lamanye amazwe womhlaba ukunanza ilanga ukuqakathekiswa kwabantwana eleWorld Children‘s Day, ngesikhathi kulenkuthazo yokulondolozwa kwamalungelo abantwana, enhlangothini ezitshiyeneyo zempilo, ikakhulu kwezemfundo, ezempilakahle, umonakalo odalwa yikuguquka komkhathi lokunye.
Abalwela amalungelo abantwana lengcwethi ezibona ngenhlalakahle yabo, bakhuthaza uhulumende we Zimbabwe ukuthi aphume lemithetho elakho ukuvikela abantwana ukuze bengahlukunyezwa. Kuthi lalabo abatholakala belamacala okuhlukubameza, afana lokubadlwengula, bajeziswe kanzima begwetshwa okweneleyo hatshi ukuyaphika iminyaka emilutshwana babe sebekhululwa besiyadala amanye amacala afanayo.
Abazali bathi leli langa liqakathekile ukuthi linanzwe kukhunjuzwane ukulondoloza amalungelo abantwana njengoba beyibo ikusasa yelizwe, ngakhoke kumele uhulumende abe lemithetho eyenza abantwana bengabhekani lobunzima ekufinyeleleleni imfundo lula, usizo lokwelatshwa kanye lokuthola imithi yokuvikela imikhuhlane, ukudla lokunye.
Abenhlanganiso ezilwela abantwana abangamantombazana ezifana leMy Age Zimbabwe, bathi udubo olukhulu okwamanje elizweni ngolokwendiswa kwabantwana besesebencane okuvame ukwenziwa ngabazali bemuli eziswelayo kunye labezinye inkolo ezifana labesipositoli.
Abe nhlanganiso ebona ngamalungelo abantu abakhubazekileyo eyeZimbabwe Disability, Advocacy, Empowerment and Technology Trust, labo bakhuthaza uhulumende ukuthi akhangelisise ilungelo lomntwana hatshi okhubazekileyo kuphela kodwa olomzali okhubazekileyo. Lokhu bakutsho ngoba besithi abantwana abancane okumele ngabe basesikolo bayabonakala ngezikhathi ezinengi beqhuba abazali abangaboniyo betshona becela uncedo empakathini kulokuthi ngabe basesikolo.
Abenhlanganiso ebona ngenhlalakahle yabantwana emhlabeni jikelele eye UNICEF bathi bahlela ukunanzwa kwaleli langa ngenhloso yokulimukisa lokukhubuza uzulu ngokuqakatheka kokulondolozwa kwelungelo lomntwana, ngoba liyafana lelomuntu omdala.
Ekhuluma emhlanganweni oqoqwe ngabe yiUnicef, kweleNamibia ngempelasonto, omunye wabasekeli bakamongameli welizweni umnumzana Kembo Mohadi, uthe ele Zimbabwe lile mithetho eqinileyo evikela lokulondoloza ilungelo lomntwana wonke njalo zikhona inhlelo ezinengi zokubona ukuthi imithetho le iyalandelwa.
Inhlanganiso eyeUnicef ithi kunje phakathi kwabantwana abalitshumi, abaphansi kweminyaka kwelitshumi yokuzalwa abathobamunwemunye babo, abakwazi ukubala lokubhala.
Kuthi phakathi kwabasakhulawo abaphakathi kweminyaka elitshumi lanhlanu yokuzalwa kusiya kwengamatshumi amabili lanhlanu, iUnicef ithi abayisilinganiso sokungamatshumi amane ekhulwini babo abala misebenzi yhokuzinakekela.
Leli langa lahlelwa ngabenhlanganiso yomanyano wamazwe womhlaba eye United Nations, ngomnyaka ka1959 ukuthi linanzwe minyaka yonke mhlaka 20 Lwezi.
Lonyaka ilanga eleWorld Children‘s Day, linanzwa phansi kwendikimba ethi ‘Every Child, Every Right’
Forum