Abalwela amalungelo oluntu sebesole kakhulu ukubulawa kwelunga leCCC uMnu Tapfumanei Masaya, yena othunjwe ngoMgqibelo eMabvuku watholakala egongodiwe efile izolo.
UMasaya uthunjwe lomunye njalo umsekeli weCCC, ngabantu abacatshangelwa ukuthi ngabacuphi bakahulumende, amaCIO, bencedisana labasekeli beZanu PF.
I-CCC ithi abathumbe ababili laba bebesebenzisa imota yelunga leZanu PF uMnu Scott Sakupwanya, yena ongaphendulanga imibuzo esimthumele yona.
UMasaya uthunjwe ngesikhathi ekhankasela ukhetho lwama-by-elections kulandela ukuxotshiswa kwelunga leCCC uMnu Febion Kufahakutizwi edale lePhalamende nguMnu Sengezo Tshabangu. Isikhulumeli samapholisa uMnu Paul Nyathi ukufakazile ukuthi kulesidumbu esidojwe ngamapholisa eHarare kodwa akatshono ukuthi ngesikabani.
Kunsukwana ezedluleyo kuthunjwe elinye njalo ilunga leCCC elimela abatsha edale lePhalamende uMnu Takudzwa Ngadziore ngabantu ababehlome ngombhobho wohlobo lweAK 47 watholakala etshayiwe njalo elimele kakubi.
Lanamuhla lokhu akulamuntu osebotshiwe phezu kwesehlakalo lesi lanxa nje abathumbi bakhe bebikwa besazakala.
Nyakenye kuthunjwe elinye njalo ilunga leCCC uNkosazana Moreblessing Ali ngowesilisa olilunga leZanu PF wayatholakala efile.
Sixoxe lesiphathamandla senhlanganiso yeIbhetshu Likazulu uMnu Mbuso Fuzwayo.
Forum