Abakumsebenzi wempilakanhle abagoqela abehlanganiso ezimeleyo eye Community Health Working Group, abongi lama Village Health Workers bakhala ngokuqonga kwesilinganiso sabantwana abaphambaniseka ukukhulu kwabo ngokuswela ukudla okwakha umzimba lababulawa yimikhuhlane ehlukeneyo, kungenza yokufinyeleli imithi lamajekiseni okuhlomisa amasotsha omzimba okuzivikela esabelweni seMatabeleland North.
Abongi laba bathi imizi eminengi lapho abasebenzela khona ikakhulu eBinga leNkayi sebenanzelele ukuba isisindo sabantwana abaleminyaka emihlanu kusehla siqhubeka sisiwa esikalini ngesizatho sokungatholi ukudla okulemisoco elungele ukwakha umzimbam
Bathi abantwana abanengi bavuswa ngamalaja, qede betshone ngawo elunyeliswa ngokufana labodelele kumbe umfushwa ongelafutha kumbe itamatisi.
Umongikazi wemaphandleni uNkosikazi Juliet Ndlovu yena osebenzela eTinde, eBinga, uthi lokhu kubangelwa yikungani kuhle kwezulu okudalwa yisigudumezi sokuguquka komumo womkhathi emhlubulweni lo, ukuze abantu bazilimele ukudla ezivandeni lasemasimini.
“Abantwana bayawa isisindo babelama-kwashioka lezihudo ezingapheliyo ngokudla okungaqondanga, njalo lebadaleni abagulayo uhlefe ngoba uyabengatholi ukudla okwakhayo.”
UNkosikazi Rachel Mholi omele isiqinti seMenda esigabeni seNkayi laye ugcizelela kokutshiyo nguNkosikazi Ndlovu.
“Ngikhuluma nje kunje ngilabadala abanatha amaphilisi kuVillage yami okufanele ukuba aluba bayathola ukudla njengamabagula umkhuhlane weHIV bayaswela ukudla labantu abanatha amaphilisi eTB kanye labonke nje abantu ukudla akukho.”
Abongi bakhala ngokusilela kokwelulwa kwengalo yosizo lwemali nguhulumende ukuze kwehliswe ukukhuphuka kokuqhamuka kwemikhuhlane ebangela ukuzaca komzimba ngokusweleka kokudla okuwakhayo lokuhlomisa amasotsha okuzivikela.
UNkosikazi Ndlovu uthi okunye njalo okusuka kube lukhuluni yikuqansa kwentengo yamaphilisi lemithi.
“Uzathola ukuthi omunye engavukelwa ngomunye umkhuhlane uba worse, uzathi esuka lapho aye eclinic afica kungelamaphilisi bemuse ephamarcy ngale endlini uyabengelakudla kuthiwe kaye epharmacy so into lezi bengazifaka ndawonye umkhuhlane ukhula ngamandla.”
UNkosikazi Jane Ngwenya laye ongumongi emangweni we Hwange, ekhangele kakhulu insane kanye labesifazane abakhulelweyo laye uthi impilo yabantu bemaphandleni isengcupheni
“Omama kakhulu bayaswela ukudla okulomsoco bezithwele ngenxa yezinswelo ezibakhona emakhaya langokungani kuhle kwezulu ukudla kuyashota emakhaya.”
Umholi wenhlanganiso ye CHWG, uMnumzana Itai Rusike uthi ukuze ziqedwe lezinhlupho, kuyadingeka ukuthi uhulumende kanye lenhlanganiso zosizo ezizimeleyo zelule ingalo kulabo abaswelayo ikakhulu ebantwaneni labomama.
“Sidinga ukuvuselelwa kwenhlelo ezifana leZesiphala seNkosi ezazixhasa labo abasendlaleni, sidinga njalo uxhaso lwenhanganiso zengalo yosizo ikakhulu ezigabeni ezifana lalezi osekulensane ezinengi ezizaciswe yindlala. Kudingeka njalo ukuba uhulumende aqinise inhlelo zentwasa ukuze umthwalo lo ungatshiyelwa inhlanganiso zosizo kuphela.”
Udokotela omkhulu wesabelweni seMatabeleland North, uMnumzana Admire Kuretu uphendule iStuio 7, ngokulotshiweyo, ethi lokhu kangabaliqiniso kumbe amanga, kodwa uma ngelokufuna ubufakazi athi yi scientific research engabe beyenzile edlula ubufakazi bamabhuku abongi laba abalobela kiwo.
Kodwa abenhlanganiso yomanyano wamazwe womhlaba kugatsha olubona ngenhlalakahle lelungelo labantwana olwe United Nations Children's Fund bethule impumela yophenyo lwabo lukaNtulikazi, oluveza ukuba kweleZimbabwe, insane ezedlula ingxenye yesigidi -half a million zifubile njalo zizace okwamagama ngenxa yokuswela ukudla okwakha umzimba, ukusweleka kwamanzi ahlanzekileyo kanye lengcekeza emakhaya.
Ngakenye babike njalo ukuba inani labantwana abangaba zinkulungwane ezilitshumi lanhlanu -15,000 behlelwe yilolu dubo lokwelatshwa imikhuhlane ephathelane lokusilela kokudla okwakha umzimba emakilinika lezibhedlela.
Forum