Abasakhulayo abalamabhizimusi asachathukayo abawasungula phansi kwehlelo zeUSA/Zimbabwe Exchange Programs, bahlangane okwensuku ezimbili, emkhosini oqhutshwe yisigodlo sommeli weMelika eZimbabwe.
Inengi labontanga baseZimbabwe, bakhala ngenhlupho ababhekane lazo ezigoqela inkudla zebulenjini zokuqhuba amabhizimusi eZimbabwe.
Ontanga laba bancedwa ukusungula lokulolonga lawa mabhizimusi phansi kwenhlelo zeMelika zokuthuthukisa intsha labesifazane basemazweni asathuthukayo.
Umhlangano lo, ubuphethe ingxoxo ezigoqela ezamabhizimusi kanye lokuzinakekela enkundleni zokuxhumana ezinjenge X, eyayisaziwa ngokuthi yiTwitter lezinye.
Omunye osakhulayo okhala ngemithelo eselizweni ephazamisa imizamo yabontanga, nguCraig Ntuliki, owenhlanganiso eye Youth Emancipation.
“Abasakhulayo sikhala ngendaba yezimali zomthelo okumele sizibhadale kuhulumende. Amabhizimusi ethu asakhula, njalo kunzima ukuthi sizuze izimali ezikhulunywa ngazo lezi. Yikho sikhala kubaphathi sisithi, nxa amabhizimusi abontanga esakhula, sicela lemithelo yankona ibe phansi, kumbe ikhitshwe okwesikhatshana.”
UNkosikazi Matlatisi Ndlovu, okunhlanganiso yeHustlers Summit, uthi bayancengisa ebhizimusini labo lokunceda abanye osomabhizimusi ukuthi bethuthuke.
“Sonke siyavuma ukuthi kunzima, kodwa siyazama ukuthi sincendise ngendlela esenelisa ngayo. Ayisikho konke esingakwenza, kodwa imizamo yethu isenelisisa okunye, njalo siyakwenza lokho. Izikhalazo zalabo esisebenza labo sazizwa, njalo sizazilungisisa.”
Kusenjalo, kube lesikhathi emhlanganweni lo, wokuxoxisana ngokuzinakekela kwalabo abalwela ilungelo loluntu enkundleni zokuxhumana ezebulenjini.
Omunye walabo abakade bekhokhela lingxoxo, uMnu. Gift Ostalos Siziba, umsekeli wesikhulumeli seCCC, uthi kunengi okumele kwenziwe ukuze abantu bethole ulwazi, kusetshenziswa ubulembu obeInternet.
“Abantu akumelanga besabe ukusebenzisa iInternet ngoba ngeyinye yendlela esetshenziswa ukuthi ulwazi ngokwenzakalayo elizweni. Kuthi njalo, imithetho yelizwe kumele ibanakekele, hatshi ukuthi umuntu engafaka umbono wakhe enkundleni zokuxhumana ebulenjini, useyesaba ukuthi engehluleka ukubona elakusasa. Okwesithathu yikuthi intengo yokuthenga iData kumele yehle, ukwenzela ukuthi umuntu wonke enelise ukuba eleInternet.”
USibongimusa Ncube, omunye laye owathola ithuba lokungena kunhlelo zeMelika, uxwayisa uzulu ukuthi azivikele nxa esebenzisa ubulembu be-internet.
“Kulezinto ezenza ingathi azila msebenzi nxa sikhuluma ngendaba zokuzivikela ebulenjini, kodwa ziqakathekile kakhulu. Nxa sifaka amaPasswords, kumele sifake aqinileyo. Kuqakahthekile njalo, ukuthi njalo nje, njalo nje, utshintshe iPassword yakho. Kubuye indaba yeWi-Fi, ngiyakwazi ukuthi abanengi bathanda engabhadalwayo, kodwa ngithi qhaphelani, kulapho elingazibeka mgceke, likhale kusasa.”
Omunye walabo ababona ngezobudlelwane lozulu esigodlweni seMelika lapha eZimbabwe, uNkosikazi Becca Archer-Knepper, uthi balesiqiniseko sokuthi umhlangano abawuqoqileyo ongowakuqala lokhe basungulayo inhlelo lezi, uncede bonke abaphatheke kuwo.
Umbutano weZimbabwe Exchange Alumni Summit, ugqitshwe lamuhla eHarare, lapho abasakhulayo abangene kuwo betshayela ihlombe uhulumende weMelika ngokubatholisa amathuba okuzithuthukisa ngolwazi, amacebo lokunye, njalo bathembise ukuyafundisa, ukucebisa lokuncedisa abanye abasakhulayo emangweni lapho abadabuka khona.
Forum