Abasakhulayo baseZimbabwe abakunhlelo zentuthuko abazisungula ngoncedo lwesigodlo sommeli weMelika elizweni, bathi ulwazi abalutholiswayo kunhlelo lezi, solubanceda ukuqhuba amabhizimusi lenhlelo zabo ngobuqotho.
Ekhuluma emhlanganweni wamalanga amabili oqhutshwa yisigodlo sommeli weMelika eZimbabwe, owokuqinisa inhlelo lamabhizimusi abontanga abathola amathuba okuzilolonga, obona ngokwethulwa kwemibiko, uMnu. Larry Socha, ukhuthaze abatsha ukuthi bengesabeli khatshana.
“Inkuthazo yami yikuthi phumali liyesungula imizamo yenyu. Imfundiso esiyipha abantu kunhlelo zethu ngeyokuthi ungafuni ukuzilinganisa labanye abakubhizimusi olenzayo, kodwa sebenza okwenelisayo. Ngobunengi obukhona emhlabeni, bakhona abakwaziyo ngokwebhizimusi lakho. Kuthi njalo, lingancitshani amacebo ngoba akulanto entsha emhabeni.”
Umgcinisihlalo wenhlanganiso yalabo abangena inhlelo zeU.S Embassy, ezinjenge Mandela Washington Fellowship, uMnu. Ben Ncube, uthi inhlelo lezi sezilethe intuthuko kwabasakhulayo.
“Ngibona njengokuthi ngenxa yokutshiyana lobunengi babantu abalapha namuhla, ubungcitshi lobu buzanceda wonke umuntu obuyileyo. Silabo abasebenza bezimele, kuthi abakungatsha ezitshiyenelo, okwenelisisa ukuthi ingqondo lamacebo atshintshanwe, okwenza imizamo yabasakhulayo ihambe phambili.”
Omunye walabo abakade bekulumhlangano, uMhlelisize Ncube, yena uthi ontanga kumele bafunde ukusebenza ngamandla lokuba lesineke, ukuze baphumelele.
“Abantu abanengi abatsha bafuna ukuthi bengahlanyela namhlanje, bavuke bevuna kusasa, kukanti akunjalo. Kufenekala ukuhlakula, uthelele lokuqunta amahlamvu Njalo akufuni ukwenza wedwa, kufuna ukubambisana labanye, ngoba wona umsebenzi nxa uwandelwe ngabantu, uba lula.”
UNkosana Mazivisa, odabuka eTsholotsho, eMatebeleland North, owathola ithuba lokuya eMelika ngomnyaka ka2016, uyawuncoma umhlangano wanamuhla.
“Nxa ngikhangele umhlangano wanamuhla, luqakathekile ngoba sihlangene, abantu kade bengazani. Njongomzekeliso kulabe AWE labe LVP, inhlelo kade zenziwa ngabantu esingazabe sibabone. Ukuba kwethu lapha kutsho ukuthi sesifunda sibonisana ukuthi lelo khuba olibambileyo, ungalicijisa njani ukuthi litshone litshaya indima.”
Osakhulayo oloba ingwalo lokufundisa intsha ngezamabhizimusi, uThabani Mlilo uthi umhlangano wanamhlanje uqonqosela ukuqakatheka kokusebenzelana kwabontanga, kwezamabhizimusi.
“Umbutano omunje uqakathekile kakhulu ngoba wenza abatsha babone indlela ezitshiyeneyo zokwenza amabhizimusi abo, kanye lokuphuma lemizamo emitsha abangayenza. Ukucabanga okutshiyeneyo embutanweni eminje lakho kwenza ukuthi indlela zokuqeda inhlupho esihlangana lazo kwezemabhizimusi, zibe zinengi. Sikhuthaza abanye abasebenza labatsha ukuthi balungise inhlelo ezifana lalezi.”
EleMelika lilenhlelo eziqondiswe kuntuthuko yabasakhulayo base Zimbabwe ezigoqela olwe The Academy for Women Entrepreneurs (AWE), African Women Entrepreneurship Program (AWEP), Professional Fellows Program, Mandela Washington Fellowship for Young African Leaders lezinye.
Umhlangano wamalanga amabili oqale namhlanje, uphela kusasa, wenziwa phansi kwesiqokoqela esikhuthaza ukumanyana kwabontanga ukuze bezithuthukise, kanye lezigaba zabo, kumbe Reconnect for Sustainable Impact.
Forum