Ilunga ledale leSenate, elikukhomithi ebona ngokudlelana kweMelika lamanye amazwe womhlaba, eyeForeign Relations Committee uSenator Jim Risch, usekhuthaze uhulumende kaMongameli Joe Biden ukuba ame ukuba lobudlelwano lohulumende kaMongameli Emmerson Mnangagwa.
U-Risch ulobele uBiden, incwadi esithi uhulumende kaMnangagwa uqhubeka engahloniphi amalungelo oluntu wathi kumele kukhangelisiswe lokhu.
Olwelwa amalungelo oluntu esebenza emahofisini awenhlanganiso yeZimbabwe National Students Union (ZINASU) uMnu Ashley Pfunye, uthi kulungile lokhu esithi uhulumende ka Mnangagwa uvele esefuna ukuba kube lamazwi asuka emhlabeni wonke azakwenza ukuba ame ukuhlukumeza uzulu.
"Lokhu kuveza sobala ukuba umhlaba wonke uyakwazi okwenzakala kwele Zimbabwe njalo kumele ibandla le ZANU PF lilungise ukuhlukunyezwa kwamalungelo kazulu"
Kodwa ilunga le ZANU PF uMnu Teddy Ncube uthi ibandla lakhe kalikungeni okukhulunywa ngele Melika.
"USenator we Melika uphungokukhuluma nje. Ukuthatha ngaphi lokhu. Ekubusweni komhlaba zinengi indlela zokukhuluma lokhu, amadale omhlaba o UN yibo abangatsho lokhu hatshi ukuthi umuntu uzikhulumela okungekhoyo "
Ziyaqhubeka zisanda izehlakalo zokwephulwa kwamalungelo kazulu eZimbabwe kulandela ukhetho olwenziwe ngoNcwabakazi lonyaka, abanengi besithi kumele iZANU PF ikhulumisane le CCC ukuze iqede ukufuthelana lokhu.
Kodwa uhulumende uyakulandula lokhu ethi akula muntu ohlukunyezwayo elizweni njalo labo abathi bayahlukunyezwa kumele bamangale emapholiseni.
Forum