Ibandla leCitizens Coalition for Change likhuthaza uzulu weZimbabwe ukuba atshengisele emigwaqweni ekhonona ngesimo esibi elizweni. ICCC ithi leli lilungelo likazulu elimunyethwe yisisekelo sombuso welizwe.
Lokhu kukhulunywe ngumsekeli wesikhulumeli sebandla leli uMnu. Gift Ostallos Siziba namuhla eHarare otshele intathelizindaba ukuba ngendlela isimo esimi ngayo elizweni kumele kube lokutshengisela ikakhulu ngokhetho olungaqhutshwanga ngemfanelo.
" Uzulu we Zimbabwe ulelungelo likutshengisela ngokungasuthiseki ngokhetho olenzakalayo. Uzulu wonke ulelungelo ukuba aziveze ukungasuthiseki kwabo"
USiziba uthe abantu akumelanga bethuselwe ukuba kukhona okuzenzakala kibo nxa bengaqala ukutshengisela ngoba kulilungelo labo.
Uqhubeke esithi lobanje ibandla lakhe liqakathekisa ukukhulumisana lebandla leZANU PF kusobala ukuba ukutshengisela yiyo yodwa indlela ezakwenza uhulumende weZimbabwe alalele inhlupho zabantu.
Uthe ukuxotshwa kwamalunga aweCCC edale lephalamende nguMnu. Sengezo Tshabangu ozithi ungumsekeli kanobhala jikelele webandla leli kwenziwa libanald leZANU PF.
Kodwa umholi womsebenzi kubandla leZANU PF uMnu. Mike Bimha uthi ibandla lakhe alilani lokwenzakala kuCCC.
" Akulani lathi ukuxotshwa kwabo ephalamende. Yindaba zabo bodwa"
Ingcitshi kwezombusazwe esebenza kunhlanganiso yeZimbabwe Initiative for Democracy, uMnu Mike Mlilo, uthi akaboni ukuba ibandla leCCC lingenelisa ukukhanga abantu ukuba batshengisele emigwaqweni.
“Bahlala bekhuluma ngokutshengisela. Abantu lapha eZimbabwe kabasathembi ukuba bangakwenelisa na lokhu."
Lokhu kusekelwe ngenye ingcitshi esebenza eUniversity of Zimbabwe efundisa izifundo zombusazwe, uMnu. Desire Sithole, othi ngendlela abantu abethuselwa ngayo akaboni ukutshengisela kuphumelela.
"Ukuthi batshengisele kungaba nzima ngoba kulodlakela olwenzakalayo kakhulu. Sibone kuphosa ukubotshwa uMkhwananzi. Kusobala ukuba bayesaba. Lozulu uyesaba ukwenza lokhu.
Kodwa esinye isakhamuzi seHarare esisekela ibandla leCCC, uMnu Liberty Muganu, uthi uyamukela inyathelo lebandla leli elokuba kutshengiselwe emigwaqweni.
“Thina njengabasekeli be CCC sithi kulungile ukuba sitshengisele. Sesifuna ukuba sitshengisele sitsho okusihluphayo ngalokhu okwenzakalayo."
Kusenjalo, omunye ozithi ungunobhala webandla leZANU PF, uTafadzwa Manyika, uthi uselobele incwadi ephalamende exotshisa amalunga angamatshumi ayisikhombisa – 70 awebandla leli esithi sebemile ukuba ngamalunga alo.
Obona ngokukhitshwa kwemibiko ku ZANU PF uMnu Farai Marapira uthi.
“Thina siyazakala indlela esimi ngayo. Siyazakala ukuba silesisekelo sethu. Inkokheli yethu iyazakala. Angiboni udaba lolu lusiphazamisa.”
Ekhuluma lentathelizindaba izolo, obona uBimha uthe ibandla leZANU PF kalimazi uManyika njalo usomlomo wedale lephalamende, uMnu Jacob Mudenda, kakayibali incwadi yakhe.
Forum