Umkhokheli wakwele Israel uMnu. Benjamin Netanyahu uthi uzabhidliza iHamas kulandela ukuhlasela ilizwe lakhe ngeviki ephelileyo.
Wethule amazwi la ngesikhathi sekulabantu abedlula inkulungwane ezine asebefile kulandela ukuqhamuka kwempi phakathi kwele Israel leHamas.
Umphathintambo wohlangothi lweMelika olubona ngokudlelana lamanye amazwe uMnu Antony Blinken ubekwele Israel ngoMvulo kulandela uhambo lwakhe emazweni akuzwekazi le Middle East abalisa eleJordan, Bahrain, Qatar, UAE, Saudi Arabia leEgypt.
UBlinken uthi uqhube inkulumo lamazwe la ngenhloso yokuvimba ukumemetheka kwalimpi esibulalise abantu abanengi yatshiya abanye bengasela mizi.
Ekuhlaziyeni loludaba iStudio7 ixoxe loSheikh Laja Yasin ongumgcinisihlalo wenhlanganiso ephathisa abantu ngemfundo igxile kumfundiso yokholo lweSi-Islam eyeMakomborero Insikelelo Trust.
USheikh Laja Yasin ukhuthaze inhlanganiso yomanyano wamazwe omhlaba eyeUnited Nations ukuthi ikhokhele inkulumo ezizaletha ukuthula eIsrael leGaza Strip.
Ekhuluma leStudio7, uMnu. Modreck Maeresera ongumkhokheli wenhlanganiso yeHarare Lemba Jewish Community yena uthe eleIsrael lilelungelo lokuphindisela njengoba lahlaselwa lilibele lingazange liqale muntu.
“Abantu beIsrael babeziphilela impilo yabo bahlaselwa belibele njalo izinto zingenzakala njalo kufanele bazivikele. ukuhlasela okunje kungenzakala kimi into engiqala ukuyicabanga yikuvikeleka kwemuli yami ikakhulu sibona ukuthi i-Israel ayisiyo eyaqala limpi kodwa yaqalwa yikuhlasela kweHamas. Kubuhlungu nje ukuthi lapho okulokulwisana khona kulokulahleka kwempilo kazulu ongela sici kodwa ngibona sengathi i-Israel ilelungelo lokuthi izivikele."
Laloba abantu bekhangelane lodubo eGaza, ngikubona kufanele ukuthi i-Israel izivikele njalo yenze lokhu ngendlela ezakwenza ukuthi ingaphindi ihlaselwe njalo kwelakusasa. Kufanele sinanzelele njalo ukuthi iHamas ayikuvumi ukuthi kube lelizwe elizimeleyo ele-Israel. Ngenxa yalokhu kunzima ukuthi kukhulunyiswane kube lokuthula, ikakhulu ukhangelane lesitha esafungela ukukubhidliza.”
Abantu abedlula inkulungwane ezingamakhulu amathathu sebelahlekelwe yindawo yokuhlala kulandela ukuqhamuka kwempi le.
Forum