Umkhokheli webandla le Citizens Coalition For Change uMnu. Nelson Chamisa uthi ibandla lakhe seliphume lesinqumo sokuba amalunga alo edale lephalamende lakukhansili ame ukusebenza kancane kuze kulungiswe udaba lokuxotshwa kwabanye babo kulelo dale lolokuqilwa kukhetho elizweni.
Lokhu kuza ngesikhathi idale lephalamende libike ukuba sokuxotshiswe amalunga aweCCC alitshumi lane laweSenate ayisitshiyagalolunye- 9, nguMnu. Sengezo Tshabangu, ozithi ngunobhala jikelele walelobandla.
Ekhuluma ngemva komhlangano wesiphangiphangi owebandla leli owe National Citizens Assembly, umkhokheli walo, uMnu. Chamisa uthe okwenzakalayo kuveza ukuba amalungelo kazulu awokukhetha inkokheli ayifunayo kawavikelekanga. Wengeze wathi ngalesisizatho ibandla lakhe selizaphuma ephalamende lasekhansilini okwamaviki amabili, kuze kulungiswe indaba ezihluphayo.
"Sesitshiyana lakho. Sesiphuma ephalamende. Lokhu kutsho ukuba akusela okuzakwenziwa ephalamende size silungise okuqakathekileyo "
Uqhubeke wathi lokhu kungehlula, ibandla lakhe lilakho ukuphuma edale lephalamende ngoba sekusobala ukuba eleZANU PF kalifuni ukusebenza lele CCC.
Lanxa kulemibiko ethi uMnu. Tshabangu usebenza lezinye iziphathamandla zebandla leCCC, uMnu. Chamisa kavumelananga lakho lokhu esithi ibandla le ZANU PF yilo elilwisana lelakhe.
Echasisa amazwi ka Mnu. Chamisa, isikhulumeli sebandla leli uMnu Promise Mkhwananzi uthi phezu kwamanyathelo okutshengisela ngokungayi edale lephalamende i-CCC izakhweza izikhalazo zayo kunhlanganiso yamazwe angezansi yezwekazi leAfrica eye SADC.
" UMongameli Chamisa utshilo ukuba sibanikeza amaviki amabili kungehlula lokhu sizaphuma ephalamende kuze kulungiswe"
Ingcitshi kwezombusazwe osebenza lenhlanganiso ye Citizens Manifesto uMnu Ashley Pfunye uthi okwenziwa yiCCC kulungile njalo kuzakwenza ukuba iZANU PF inanzelele ububi bokuxotsha amalunga alelibandla nxa kuyiyo esebenzisa uMnu. Tshabangu.
" Kuqakathekile abakwenzileyo lokhu ngoba ephalamende sokungcolile. Kuqakathekile ukuthi betshengise amandla asebantwini ababakhethayo "
Kodwa obona ngokwethulwa kwemibiko kubandla le ZANU PF uMnu Farai Marapira uthe okwenzakalayo akulani lebandla lakhe.
" Lokhu kutshengisa ukuba kabalaqiniso. Nxa becabanga bekuvuze bebekwazi ukuthi thina njenge ZANU PF asilamandla okuxotsha elinye ibandla ephalamende "
Ingcitshi kwezombusazwe esebenza lebandla le People’s Unity Party of Zimbabwe uMnu Hebert Chamuka uthi kumele kube lokukhulumisana phakathi kwebandla le ZANU PF lele CCC ukuze kuphele ukufuthelana osekukhona elizweni.
" Uhulumende womanyano uyafunakala kakhulu phakathi kwe ZANU PF le CCC, kodwa iZANU PF kayethembakali ikakhulu nxa sekuzindaba zezikhundla "
Emhlanganweni wabo owe nkokheli yeCCC bathe sebenanzelele ukuba kulobunzima obubhekane lozulu we Zimbabwe ngakhoke kuqakathekile ukuba kube lokukhumisana umlotha lebandla le ZANU PF.
Baphinde babonga uzulu weZimbabwe ngokuvota besithi amanye amalunga abo aqhubeka ehlukunyezwa esetheswa icala lokusekela iCCC ngemva kokhetho lobanje solwedlule.
Forum