Uhlangothi lukahulumende olubona ngokuphehlwa komlilo kagesi olwe Energy and Power Development luthi ludinga amabhiliyoni afika phose itshumi amadola eMelika – US$9 billion eyokwakhe isititshi ezeneleyo zokulungisa umlilo kagesi kwele Zimbabwe okuzakwenza kuphele uhlupho lokucitshwa kwama gesi.
Linkulumo yethulwe ngumabhalane omkhulu wohlangothi lolu, uNkosikazi Gloria Magombo, otshele lumsakazo ukuba uhlupho lomlilo kagesi lubangelwa yikukhula komnotho wakuleli kanye lenani labantu abawusebenzisayo.
“IEnergy sector iyakhula, njalo ukuze ihlale kufuze ihambelane lokukhula kwelizwe ngakho sidinga imali efika ku nine billion ukuze siqhubeke sakhe. Sikhangele ama solar asebenzisa ilanga, ama wind plants awomoyo, ama damu sikhangelele njalo njalo iproduction evela ku gas lakuma coal plants.”
UNkosikazi Magomo uthi lokhu kungafezwa yikuzinikela kwezizalwane zalapha leziphandle kwelizwe, athi kunje basadla amathambo engqondo ngomzamo wokuphuma lomthetho ozakwenza laba baphosele imali engcebethwini kahulumende ukuze kwakhiwe izititshi ezeneleyo zikagesi.
“Sifuna ama instruments okumele afakwe azakwanisa ukuthi lokhu kwenzakale. Sesikubonile lokhu kusenzakala eEthiopia besakha iRennaisance Dam yabo besebenzisa imali zabo leze diaspora, thina sikholwa ukuthi singakwenza okufanayo. Sithi iprivate sector layo izimisele ukwenza ama projects abo esiwathi ngama commercial and industrial projects asebenzisana lama development partners’ ukuze labo bathole imali yokuthi sisizane sisaka.”
Phezu kwalokhu, uMagomo uthi bakhangelele njalo ukuthi imali le bayithole kunhlanganiso zamazwe ehlukeneyo ukuthi zibasize ngemali yokwehlisa izinga lobukhuni bokuguquka komkhathi - iclimate change.
“Kunje asitholixhaso loba kuliphi ilizwe, kodwa siyakudinga lokhu ngesimo sobunzima bokuguquka komkhathi.”
Kodwa ingcwethi ecubungula ezombusazwe ekunhlanganiso yabathengi iNational Consumer Rights Association, uMnumzana Effort Ncube, uthi ilakho ukutshaphazwa ngabanye abantu imali engaqoqwa ngabahlala eZimbabwe labadabuka elizweni leli abahlala kwamanye amazwe eyokulungisa izititshi zikagesi.
“Lokhu uhulumende akukhulumayo akusebenzi.
Okwazakala kusebenza emhlabeni okokuqala yikuthi kutholakale imali kuyonale imthelo evele ikhona njalo okwesibili yikuthi kuqedwa icorruption ngoba imali ekade ingenza kube lamagetsi eneleyo iyalahleka kucorruption, okwesithathu yikuthi uhulumende ehilse indleko ze wasteful expenditure njalo uhulumende ancedisane lenhlanganiso ezizimeleyo ukwakha izititshi zamagetsi.”
UNcube uthi okunye njalo okudingakalayo yikuthi uhulumende axhasane lamankapani kuzwekazi leAfrica ukuze kwakhiwe, hatshi ngokucela ingcebethu athi kuyisijeziso kuzizalwane zakuleli.
Kusiyabamba isikhathi sokhetho kunyanga ka Ncwabakazi, uhulumende wethula ukuba uhlupho lomlilo kagesi seluzaba yinto yayizolo ngemva kokuvulwa kwesinye sezititshi eHwange, kodwa lanamuhla lusaqhubekela phambili. Osomabhimuzi bathi lokhu sekubawisele phansi.
Forum