Abenhlangothi ezitshiyeneyo eZimbabwe batshengisa ukukhathazeka kwabo ngombango we-Israel-Palestine osuleminyaka eminengi ukhona, osuvuke njalo ngemva kokuba iqembu le-Hamas liqale ukuhlasela okubangele ukuthi eleIsrael iphindisele ngokwesibanga esiphezulu.
Inengi lithi okwenzakalayo kuyethusa njengoba impilo zabantu zitshabalala mahlayana ngenxa yalombango osuvukile njalo phakathi kwamazwe womabili la. Bathi okudanisayo yikuthi sokusifa abantu makhaza abagoqela abantwana labesifazane.
UMnumzana Teddy Ncube ingcwethi ecububungula ubudlelwano bamazwe, uthi lolu ludaba olwaziwayo njalo seludonse iminyaka eminengi lungalungisiswanga, labamazwe omhlaba bengazihluphi ukululungisisa.
“Lokhu kutshengisa kakhulu esingakuthi yi-failure of diplomacy ngoba udaba lolu phakathi kwePlesine leIsrael, ludaba okade lukhona okweminyaka eminengi njalo ludaba okade luyaziwa ngabezombusazwe at a Global Scale esingathi ngabu-United Nations, esingathi ngamanye nje ama-bodies atshiyetshiyeneyo. Kodwa bekwazi ukuthi kulohlupho olunjalo abalanto abayenzileyo ukuncedisa kakhulu elePalestine abayibo asebebone kungcono ukuthi bathathe umthetho bawubeke ezandleni zabo ukuthi bazikhulule kuhulumende woncindezeli uhulumende we-Israel.”
UMnu. Ncube, ongumcebisi kunhlanganiso yeLeaders for Africa Network wengeze esithi lokhu bekungafanelanga kwenzakale ngoba bekulezinye indlela zokukhulumisana phakathi kwamazwe womabili kodwa kwaswelakala ukuzinikela kwabezombusazwe.
“Ikakhulukazi kwamanye amazwe ukuthi bancedise bona labo esingathi ngama-victims, i-political will yona leyo ukungabi khona kwayo yikho osekulethe loluhlupho esesilalo. Kodwa kuyisifundo futhi kakhulu ukuthi i-conflict akumelanga ihlale ize ikhule to i-stage yona leyi esifike kiyo. Silezindawo ezinengi ezilohlupho oluphosa lufanane lalonalolu okokuthi kuzacina kufika ku-armed conflict nxa abantu abayibo abakhangelelweyo ukuthi bayenze something bengasayenzanga lutho. Kuhle kakhulu ukuthi bekuthathe njenge-lesson bekusebenzise ngoba silamanye amazwe ayiwo futhi njalo alohlupho lonalolu.”
Intathelizindaba uMnu. Tendai Makaripe, oyingcwethi ecubungula ezombusazwe ezimele kanye lezobudlelwano bamazwe uthi lokho okwenzakale phakathi kwamazwe amabili la yisibonelo sokuthukuthela lokuphelelwa kwabantu base Palestine.
“Kusukela ngo-1948, i-Palestine ihlezi ingethwaliswe amagabha avuzayo, i-Israel ihluthuna umhlabathi, ibulala izizalwane zasePalestine lokunye okunenginengi. I-HAMAS ikubone kufanele ukuthi kuthathwe amanyathelo kakhulukazi uma kunanzelelwa ukuthi akukho okunengi obekusenziwa ngamazwe womhlaba, ukuxazulula nkinga le.”
Omunye wabaphatheka kumikhankaso yombuso kazulu uMnumzana Charles Nyoni ugcizelele esithi kuyadanisa kakhulu osekusenzakala phakathi kwamazwe womabili la.
“Kuqakathekile ukuthi amalungelo awozulu wePalestine lawo ahlonitshwe njalo baphiwe okuhle abakukhangelelayo ngoba ukuthi betshone belwisana ngendaba eyezokholo akusizi lutho njalo akuncedi.”
Isikhulumeli kubandla leCitizens Coalition for Change uMnumzana Promise Mkhwananzi uthi isifiso sabo yikuthi kube lokuthula phakathi kwePalestine leIsrael.
“Siyakhuleka lokukhuthaza iUnited Nations lamanye amazwe amakhulu ukuthi ancedise ukuthi amazwe la amabili akhulumisane bemise impi enzakala phakathi kwamazwe lawa, bakhulumisane balethe ukuthula lobudlelwano phakathi kweIsrael leHAMAS. Kodwa phansi komhlaba wonke jikelele kuyisifiso sethu ukuthi ukuthula kube yikho okubusayo.”
Umqondisi wenhlanganiso yomanyano wamabandla ezokholo lwesiKhristu eyeZimbabwe Christian Alliance, uMfundisi Useni Sibanda, uthi ngabe kuba lokunanzelela okukhulu nxazombili ukuze limpi le ingacini isingememethekayo.
“Ngoba siyananzelela ukuthi kulamanye amazwe asemaceleni asemngceleni we-Israel angacina ethelela engenela lindaba, sikhangele o-Lebanon kulabo-Iran, bengangenela lindaba sibona iMelika lamanye amazwe angeke ama eceleni ngenxa yokuthi iMelika ilesifungo sokuvikela i-Israel ngakho ngeke yama eceleni ngingayibona layo isingenela kucine ke limpi isimemetheka isiba yimpi enkulu kakhulu.”
UMfundisi Sibanda uthi kufanele impi le ingamemetheki njengoba kuleyinye njalo elokhe iqhubeka phakathi kwelizwe leRussia leleUkraine.
“Kungaba laleyi eyesibili ngibona angani izinto zingama manzonzo ngakho ke into eqakathekileyo yikuthi ngabe kungaba lendlela abangehlisa ulaka kungehlisa njalo ke ukulwa lokhu kube lokungenela okungenzakala ukwenzela ukuthi kube lokuthula singalahlekelwa ngezinye futhi njalo impilo. Thina ngapha njengamaKhristu siyaqhubeka phambili sithandazela ukuthi kube lokuthula njalo ke kungalahleki impilo zabantu.”
UMfundisi Raymond Motsi, webandla leBaptist Church njalo engokhankasela ukuhlalisana ngokuthula uthi udaba lwePalestine leIsrael ludinga ukuthi kuhlalisanwe phansi kukhulunywe ukuze lulungisiswe.
“Akula eyinye into, iMelika ingangenela isapota i-Israel, kakusoze kuntshintshe lutho, amaArab bangenela besapota amaPalestine, akusoze kutshintshe lutho. Ngoba siyakwazi, abangeke bakhiphe abantu elizweni lakibo bebasa kweyinye indawo besithi phumanini ngapha, abeUnited kumele bangenele. Kungenxa yokuthi khona i-America ithatha vele icele, basekela ama-Isralites."
Besingakatholi umbiko ovela kuhulumende ngaloludaba, njengoba isikhulumeli sogatsha lobudlelwano lamanye amazwe uMnu. Livit Mugejo ethe uhulumende kakethuli umbiko wakhe.
Umphathintambo walolugatsha uAmbassador Frederick Shava ubengenelisi ukukhulumisana lalumsakazo njengoba bekuthiwa usemhlanganweni. UMnumzana Farai Marapira, obona ngokwethulwa kwemibiko kubandla leZanu PF, uthi bafisa ukuba eleIsrael labePalestine bakhumisane umlotha.
Forum