Ibutho lakwele Israel selihlasela ePalestine ngamandla osokufe abantu abafika ingxenye yenkulungwane – 500 selokhu kuqhamuke impi le ngoMgqibelo.
Abezindaba abeAssociated Press babika ukuba eleIsrael selisebenzisa indizamtshina ezithwala imibhobho njalo lama missiles eliwaphosa elandelana ukwenzela ukunqoba iHamas etshaya phansi ngenduku isithi izakwenza izimanga lonyaka.
UMnu. Benjamin Netanyahu, umkhokheli wakwele Israel uthi kumele iHamas, esibulele abantu bakulelolizwe abangamakhulu ayisikhombisa – 700, yehlulwe njalo ilizwe lakhe lihluthune iPalestine okwesikhatshana.
Sekulimele abantu abafika inkulungwane ezimbili ePalestine lakwele Israel lapho abalokhu belwisana leHamas engane belibele.
Uhulumende wakwele Melika uthi kulezizalwane zakulelolizwe ezine ezibulewe empini le. Abanye njalo ngabadabuka kwele Bhilithane, France, Nepal, Thailand lakwele Ukraine. Kulazizalwane zakwele Zimbabwe ezisebenza kwele Israel ezithi sibi kakhulu isimo sezomvikela kulelolizwe.
UNkosazana Vivian Nomalanga Bhebhe, odabuka kwele Zimbabwe ohlala eTel Aviv, uthi namuhla uphenduke endleleni ezama ukuya emsebenzini ngenxa yokuswelakala kwamabhasi lezitimela.
UNkosazana Bhebhe uthi iqhubekela phambili impi le osokulimele abantu abedlula inkulungwane ezimbili.
Forum