Uhulumende weleSouth Africa usevimbe ukutshengisela obekuhlelwe ngabenhlanganiso yabadabuka eZimbabwe asebehlala kwele South Africa, eye-Economic Revolutionary Alliance, emngceleni weMusina.
Ukutshengisela lokhu bekufanele kwenziwe ngoMgqibelo.
Lokhu kuza kulandela umhlangano oqhutshwe izolo, eMusina, ngumongameli Emmerson Mnangagwa lomunye wakhe wakweleSouth Africa, umnu Cyril Ramaphosa.
Umnu Landelani Ncube ekhuluma leStudio7 echasisa loludaba, ekhonona ngokuthi kulezinye inhlanganiso ezijonge ukubaphazamisela inhlelo zabo.
Kodwa, umnu Lizwe Dube oweyinye njalo inhlanganiso yabeZimbabwe asebehlala kwele South Africa, eye Progressive Zimbabweans in South Africa yena uthi abalasandla kuloludaba njalo okwabo ukutshengisela kuzaqhubekela phambili mhlaka 26 Mfumfu.
Ukhuthaze abenhlanganiso yeEconomic Revolutionary Alliance ukuthi bahlanganyele ndawonye lenhlanganiso yakhe mhlaka w6 Mfumfu njengoba izikhalazo zabo zifanana.
Abenhlanganiso yeProgressive Zimbabweans in South Africa bathi batshengisela bekhonona ngokungahlonitshwa kwamalungelo kazulu eZimbabwe, ukungaqhutshwa kuhle kokhetho kanye lokungaqhubi kuhle kwezomnotho osekubangele ukuthi bahlale ngaphandle kwelizwe.
Forum