Ozithi ulilunga lebandla eliphikisayo eleCitizens Coalition for Change eliphethe isikhundla sikanobhala jikelele webandla leli, uMnu. Sengezo Tshabangu, usebhalele usomlomo wephalamende uAdvocate Jacob Mudenda incwadi exotshisa amanye amalunga edale lepalamende awe-CCC.
UTshabangu uthi uxotshise amalunga edale lephalamende la kanye lamakhansila esebenzisa amandla avela ebantwini.
“Ngibhale lincwadi njengonobhala jikelele webandla. Lokhu sikwenza ngoba sifuna ukuletha ubukhokheli bentando kazulu, ngakho sikhuphe abakhokheli abangakhethwanga nguzulu abalethwa yibukhokheli bebandla bungavumelananga labantu.”
Kodwa umsekeli wesikhulumeli sebandla leCitizens Coalition for Change, uMnu Gift Ostalos Siziba, uthi akulabantu ababaxotshileyo.
“Sibone incwadi ezibhodayo kuthiwa zivele kubandla le-CCC, sifuna ukwazisa uzulu ukuthi incwadi lezi asizazi ayisizo zethu. Thina akulabantu esibaxotshileyo, ngakho sikhuthaza abantu bethu ukuthi baqhubekele phambili ngomsebenzi.”
Ngakwelinye icele, umqondisi wenhlanganiso esebenzelana leZanu PF, eye-Forever Associates Zimbabwe, uMnu. Kudakwashe Munsaka uthi inhlanganiso yakhe ayikungeni lokho njengoba yona yaphathisa ibandla leZanu PF ukuthi linqobe njalo selanqoba ngakho lokhu akulincedi ngalutho.
Usomlomo wedale lepalamende uAdvocate Jacob Mudenda uthi bayamukele lincwadi njalo bazalandela imithetho yedale esebenza nxa kube lencwadi enje ethunyelweyo. Wengeze esithi ibandla leCitizens Coalition for Change liyenelisa ukubhalela ephalamende liphikisa okumunyethwe yilincwadi.
Abanye balabo abaxotshiswe nguTshabangu ngamalunga edale lephalamende athi, uMnu Pashor Raphael Sibanda omela iCowdray Park, uMnu Ereck Gono omela iLobengula-Magwegwe, uMnu Morgen Ncube omela iBeitbridge West, uMnu Prince Dubeko Sibanda omela iBinga North, loMnu Febion Munyaradzi Kufahakutizwe oweMabvuku-Tafara.
Amakhansela agoqela umsekeli kaMayor wakoBulawayo, ukhansela Donaldson Mabutho, uMayor weMasvingo ukhansila Shantel Chiwara, lomgcinisihlalo wekhansili ye-Epworth ukhansila Anna Sande.
Forum