Iqembu leDynamos leleBlack Rhinos asefinyelele esigabeni se Semi -Final eyenkezo yeChibuku Super Cup ngemva kwemidlalo edlalwe NgoMgqibelo emini.
Iqembu leChicken Inn linqotshwe nge 2 ka 1 ngeleBlack Rhinos ngaseLuveve, kuthi ngaseMandava iqembu leFC Platinum litshaywe nge 5 ka 3 ngeleDynamos ngemva kokutshaywa kwembekwa, isikhathi besiphele zingutshiki lobhanqa 1 ka 1.
Kweminye imidlalo yequarter – final ezadlalwa kusasa ngeSonto iqembu leHighlanders lizemukela eleCaps United ngaseBarbourfields kuthi eleHerentals College lizangqikilana leleNgezi Platinum Stars ngaseNational Sports Stadium.
Iqembu leHighlanders leleCaps United adibana ngemva kokungadlali kuhle kumidlalo eyedluleyo eyeligi kodwa umsekeli kamqeqetshi weqembu leHighlanders uMadinda Ndlovu uthi kulomehluko omkhulu phakathi komdlalo weligi lowenkezo.
“Kufana lembheji, kumele uhle utshaye eziwayo emdlalweni wenkezo. Sizazama ngamandla ethu wonke. Akumelanga siyale silokhu sikhuluma ngemidlalo leyi esidliwe khona kodwa kumele sikhangele umdlalo ngamunye ngamunye. Kumele sikhangele umdlalo wethu leCaps sibone ukuthi sizadlala ngendlela esilungiselele ngayo,” kutsho uNdlovu.
Iqembu leHighlanders linqobe kanye kumidlalo yalo emihlanu eyedluleyo kuthi eleCaps lona selilemidlalo eyithoba munwe munye lisehluleka ukunqoba.
Umdlali weqembu leHighlanders uMelikhaya Ncube laye uthembise ukuba labo njengabadlali bazabopha ziqine.
“Thina esikutshelana njengabadlali yikuba kumele sisebenze gadalala ukuthi wonke umdlalo sinqobe. Nxa kuyiligi sithathe yonke imiklomelo ikanti kulumdlalo owenkezo kumele sihle siwuphathe njengembheji senelise ukunqoba,” kutsho uNcube.
Iqembu elizaphakamisa inkezo yeChibuku yilo elizamela ilizwe leZimbabwe kumncintiswano weCAF Confederations Cup ngomnyaka ozayo.
Nyakenye iqembu leBulawayo Chiefs yilo eliphakamise inkezo kodwa alisenelisanga ukuyancintisa eAfrica ngoba ilizwe leZimbabwe belimiswe ukuphatheka kumncintiswano eqoqwa ngaphansi kokuqondisa kwenhlanganiso ebona ngokuqhutshwa komdlalo wenguqu emhlabeni jikelele eyeFIFA.
Kusenjalo, iqembu labesilisa elimela ilizwe emdlalweni wenguqu linqotshwe nge 4 ka 3 ngeleBotswana ngemva kokutshaywa kwembekwa emdlalweni wokuthakazalela ukuthola kwelizwe leBotswana uzibuse.
Forum