Abantu abayisithupha abenkampani yeMurowa Diamonds Mine, bafele engozini yokuwa kwendizamtshina ewele eplazini lePeterhouse eZvamahande eMasvingo ngolwesihlanu ekuseni.
Ababili kubikwa beyizizalwane zeZimbabwe abanye abane becatshangelwa ukuthi yizizalwane zeIndia
Indizamtshina le kubikwa ibivela eHarare isiya emgodini wamadayimana oweMurowa Diamonds oseChivi, njalo akukaziwa ukuthi kuyini okubangele lingozi.
IStudio 7 ifike lapho okuwele lindizamtshina yathola izakhamizi zalindawo sezibuthene ziphathisa amapholisa ukubuthanisa izidumbu, zisithi zizwe umsindo lindizamtshina isiwa zahle zagijima ukuyophathisa kodwa zathola abakade bekulindizamtshina sebefile bonke.
Isikhulumeli samapholisa uAssistant Commisioner, Paul Nyathi, uthe ingozi le yenzakale phakathi kuka 7:30 kusiya ku 8:00 ekuseni ngemva kokuba lindizamtshina isuke eHarare ngehola lesithupha (6am).
Le isiyingozi yesibili eyenkampani le lonyaka kulandela ukuwa kweyinye indizamtshina eyayilezisebenzi zeMurowa Diamonds ngonhlolanja eBeatrice eMashonaland West.
Forum