Abesifazana koBulawayo abaphose bafike amatshumi amane - 38 namuhla baphiwe izithupha zokuqeqetsha kumabhizimusi phansi kohlelo olukhokhelwa nguhulumende weMelika olubizwa ngokuthi yiAcademy Women Enterprenuers.
Bajabule okumangalisayo abesizafana laba abafundele ukuqhuba amabhizimusi atshiyeneyo abathole izithupha zabo eNational University of Science and Technology American Space. Uhlelo lolu lusekelwa libhanga leCABS levinkili lePicknPay.
UNkosikazi Sifiso Agbetorwoka, okubhizimusi lokufuya imbuzi ongomunye wabathole isithupha, ubonga imfundiso lomvuzo wemali ayithole kulolu hlelo.
"Ngiyabonga ngohlelo lweAWE senona izithelo zakhona ngileminyaka emine ngifuya izimvu. Ngifunde okunengi ikakhulu ekuqheliseni ibhizimusi lokuncedisa labanye abafisa ukungena kubhizimusi engikuyo."
UNkosikazi Sithabile Ndou odabuka eBeitbridge, eZansi yeMandebeleni, okubhizimusi yokwakha, uncoma uhlelo lweAWE.
"Lokhu sekuncede ukuba ngihleleke kubhizimusi lami ngiqale lokuhlela kuhle inzuzo yemali ngikubhizimusi lokwaka lihamba kahle sengihle ngaqala ukubona izithelo zaemfundiso."
Osakhulayo ongene kuhlelo lweAWE uNkosazana Musawenkosi Moyo uthi ukubhizimusi lwezebulenjini.
"Kunengi engikufundileyo okuzanginceda kubhizimusi lami lezebulenjini ukuba lithuthuke njalo okunye kwalokho engikufundileyo sengikusebenzisa kubhizimusi lami."
UNkosikazi Siqinisweyinkosi Mhlanga olebhizimusi lamakolitshi uthi sekulamanye amabhizimusi asewasungule ngaphansi kweyezemfundo.
"Ngilekolitshi elifundisa abantwana abanengi, kunengi esengikunanzelele ebengingakwenzi ngendlela ekuphatheni ibhizimusi lami njalo kungivule amehlo ngabona ukuba akhona amanye amabhizimusi engizawaqala ahambelana lengiwenza okwamanje."
UNkosikazi Thubelihle Ndlovu osebenzelana lohulumende weMelika ukufundisa ezamabhizimusi ngaphansi kweAWE uthi lonyaka bafundise abantu abalikhulu.
"Lonyaka sifundise omama abalikhulu uhlelo lolu lwaqala ngomnyaka 2019 sesifundise omama abangamakhulu amane. Omama bafundiswa ngendlela zokuthuthukisa amabhizimusi abo lokwenza imali ngoba inengi alilalwazo lwalokhu."
Obona ngokuqhutshwa kwenhlelo esigodlweni seMelika uNkosikazi Rebecca Archer-Kneppper, okuwofisi yeUSA Public Diplomacy Section, uchaza injongo yohlelo lweAcademy Women Enterpreniers.
"Uhlelo lolu siluqhuba eHarare, koBulawayo eMutare, eBeitbridge lehwange njalo sifinyelela kuyewonke usomabhizimusi wesifazana. Uhulumende weMelika wasitholisa imali yokuhlomisa osomabhizimusi besifazana labasakhulayo kuleli njalo loluhlelo luqhubeka kuhle kuthi osomabhizimusi abenza kahle labo bayatholiswa imali yokuqala amabhizimusi."
Imfundiso yamabhizimusi ephiwa abesifazana ngaphansi kweAcademy Women Enterprenuers luqhutshwa yinhlanganiso yePurse on Point besekelwa luncedo lwemali evela kuhulumende weMelika.
Ngomnyaka ozayo isimemezelo sokudinga abafisa ukufunda ngezamabhizimusi siyamenyezelwa NgoMbimbitho womnyaka ozayo.
Lonyaka abenelise ukungena kulolu hlelo, bangamatshumi amathathu lasificaminwe mibili koBulawayo. Abathathu babo bathole umvuzo wenkulungwane eyodwa yamadola eMelika-US$1,000, ngamunye yokuncedisa ukuthuthukisa amabhizimusi abo.
Forum