UAbraham Mbaiwa, owayengumdlali wamaqembu abalisa eleHighlanders, iChapungu kanye leZimbabwe Saints, ukhuthaza abaqeqetshi kanye lenkokheli zomdlalo wenguqu ukuba bayamukele ulwazi lwakulezinsuku olwe sports science.
UMbaiwa, ofundele izifundo zesports science ekolitshini leNational University of Science and Technology, uthi kuhle kakhulu ukuba sebebanengi abafundele isports science elizweni. Uthi okuqakathekileyo yikuba basebenzise lokho abakufundayo ukuthuthukisa umdlalo wenguqu.
“Sisesimeni esihle kodwa okusemqoka yikuba siyenelisa yini ukuyamukela ulwazi lwakhona sonke. Abaqeqetshi kanye lenkokheli zamaqembu kumele bayamukele lolulwazi ngoba yilo olusetshenziswa kwamanye amazwe ukuthuthukisa ibhola labo njalo siyababona baqhuba kuhle.”
Ngesikhathi efunda eNUST, uMbaiwa ubevele eqeqetsha iqembu labasakhulayo eleFirst Mobile Academy kwasekuthi nyakenye iqembu leBulawayo Chiefs limuphe ithuba elokuba asebenzise ulwazi lwakhe kusigaba saphezulu esePremier Soccer League.
“Ithuba engiliphiwe liqembu leBulawayo Chiefs lingiphakamise kakhulu langenza lami ngafunda ezinye izinto ebengingazazi. Yebo kambe besifunda eNUST kodwa nxa ungazange uthole ithuba elokusebenzisa lokho oyabe ukufundile awungeke ukubone usizo lwakho. Kunengi engikufunde kuqembu leBulawayo Chiefs ngisebenza loNilton (Terroso) owathatha isikhathi sakhe ukuthi angifundise izinto ezimbalwa. ”
Lonyaka uMbaiwa uphenduke kuqembu elimkhulisileyo eleHighlanders lapho aqhatshwe khona ukuba nguye okhangele ukuqina kwabadlali.
Ubeyingxenye yabaqeqetshi abasebenze leqembu lesizwe lapho lidlala leleNamibia ngosuku kugcotshwa uMongameli Emmerson Mnangagwa.
“Yilo uhambo lwami. Ngikuqembu leHighlanders lapho engisebenza khona lomqeqetshi uBrito kanye labanye abalolwazi olubanzi aboJoel (Luphahla). Ngilokhu ngifunda ngisiya phambili njalo ngike ngabizwa ngaba yingxenye yeqembu lesizwe okutshengisa ukuba kukhona ingqubelaphambili.”
UMbaiwa ukhulele eMakhandeni lapho abonwe khona ngumqeqetshi olodumo, uAli Baba Dube, edlala inguqu wasesiyadlala kuqembu labasakhulayo eleHighlanders. Udlale waze waba yingxenye yeqembu elikhulu eleHighlanders ngomnyaka ka2000 kodwa bekunzima ukudlala waze wacina esiyadlala kuqembu leChapungu lapho adlale khona waze waphenduka kuqembu leHighlanders ngo2007.
Uke wadlalela njalo amaqembu abalisa eleBantu Rovers kanye leleZimbabwe Saints njalo wekele ukudlala ngo2015 ngesikhathi esefundele ukuba ngumbalisi njengoba wayesefundisa eMabhikwa High School eLupane.
Forum