UMongameli Joe Biden weleMelika, uthi ilizwe lakhe likhuthaza umbuso wentando kazulu emazweni wonke womhlaba, ukumiswa kwempi e-Ukraine kanye lobudlelwano obuhle leleChina.
Lokhu bekusembikweni wakhe awethule emhlanganweni wamazwe womhlaba, owe-United Nations General Assembly osungulwe ngokusemthethweni namuhlanje e-New York eMelika.
Wengezelele ngokwethembisa ukuvikela umbuso wentando kazulu emazweni atshiyeneyo womhlaba agoqela awezwekazi leAfrica, eleAsia lamanye.
“Ngesikhathi silemihlangano eyokuvimba imibuso eyabontando kayiphikiswa sibhekane lobudlwangudlwangu bokugenqulwa kwabohulumende ikakhulu entshonalanga yezwekazi leAfrica. Siyakunanzelela ukuthi umkhulu umsebenzi okumele siwenze ukuze kubelohulumende kazulu emazweni atshiyeneyo.”
Uqhubekele phambili esithi iMelika lamanye amazwe asebenzela ndawonye layo bama leUkraine ekuhlaselweni kwayo yiRussia osekubangele impi esileminyaka emibili.
“Njengamazwe onke omhlaba sifuna ukuthi impi ekwele-Ukraine iphele. EleRussia yilo elenza ukuthi kube lalimpi njalo yilo elingayimisa. EleRussia yilo elingafuni ukuthi kube lenhlalakahle kwele-Ukraine. Kumele kumiswe impi le ngoba ibulala abantwana labomana. IRussia iqhuba lokhu ilethemba lokuthi amanye amazwe azadinwa kodwa sizimisele ukuvikela eleUkraine.”
U-Biden uphinde waphatha ngokuqakatheka kobudlelwano beMelika leChina, esithi ilizwe lakhe lidinga ukusebenzelana kuhle kwamazwe womabili.
“Uma sikhuluma ngokweChina sifisa ukuthi sincintisane lelizwe leli ngokukhanyayo hatshi ukuthi sicine sisilwa. Asisoze sivume ukuthi kucine kusiba lokulwisana phakathi kwamazwe la.”
Ekhuluma ngesikhathi esungula umhlangano walonyaka oweUnited Nations General Assembly oqale izolo eNew York unobhala jikelele weUnited Nations umnu Antonio Guterres ukhuthaze abakhokheli bamazwe omhlaba ukuthi basebenze ndawonye.
“Ukuzikhethela kuya kusehla, ubukhokheli obungafuni ukuphikiswa, ukungalinganiswa kwabantu kanye lenzondo kuyengezeleleka. Ngesikhathi sikhangelane lobunzima lobu lobunye kufanele sithathe izinqumo ezakha amazwe hatshi ezamadlwane. Njengalokho engakutshoyo emhlanganweni weG20 sekuyisikhathi sokuthi amazwe azwisisane, ezombusazwe, ubudlelwano lamanye amazwe lobukhokheli kufuna ukuzwisisana hatshi inkani.”
Ingcwethi yezombusazwe umnu Raphael Mthombeni uthi umbiko kaMongameli Biden uqakathekile kakhulu ngalesi sikhathi izwekazi leAfrica libhekane lodubo lokuhluthunwa kwentambo zombuso emazweni atshiyeneyo agoqela iGabon, Niger lamanye.
Umhlangano ka 2023 owe United Nations General Assembly uqhutshwa phansi kwendikimba ethi, “Rebuilding Trust and Reigniting Global Solidarity.” Abakhokheli bamazwe atshiyeneyo agoqela iZimbabwe, iSouth Africa lamanye, sebefikile emhlanganweni omkhulu lo, owenziwa minyaka yonke wokuhlaziya indaba ezitshiyeneyo ezigoqela umbuso wentando kazulu, ukuguquka komumo womkhathi lokunye, uqhutshelwa edolobheni eleNew York kweleMelika.
Forum