Zithwele nzima izakhamizi esigabeni seMangwe esabelweni seMatabeleland South ezibhekane lokuswelakala kwamanzi. Isigaba seMangwe sisendaweni okufunakala izibholane zamanzi okusetshenziswa yizakhamizi kanye lalapho okunganatha khona inkomo ezihamba umango omude zisiyadinga amadlelo lamanzi. Isakhamuzi seMakorokoro, uNkosikazi Ncube, uthi izifuyo lezakhamizi zibhekane lodubo lwamanzi.
"Umango wakithi womile abantwana bahamab umango omude besiya esikolo lalapho besiyakukha amanzi okunatha izifuyo asikhulumi."
UMnu. Tommy Nkabi laye uthi izifuyo azisela manzi lamadlelo ngoba umango wabo womile.
"Ngabe kwakhiwa amadamu kugejwe lezibholane ngoba izifuyo zethu azisela madlelo lamanzi okunatha umango wethu womile."
Uyakhala lokhansila kaWard 17 eMakorokoro, uMnu. Mpendulo Ncube, okubandla leZAPU.
"Isiqinti sami seMakorokoro abafundi lezakhami kuhlanganisa lezifuyo babhekane lodubo lwamanzi kuthi umango wethu ingathi yidessert sikhangelele ukuba uhulumende asiphe imali yokugebha izibholane lokwakha amadamu."
UNkosikazi Priscilla Moyo, owebandla leZanu- PF ongene kukhansili yeMangwe emele omama kuWard 15, uthi ukhangelele ukuba ikhansili lohulumende bazabalungisela udubo lwamanzi.
"Isiqinti sami sibhekane lodubo lwamanzi omama bathwelenzima kunye labafundi kusweleka ngitsho lezingadi asilamanzi."
UNkosikazi Ottilia Sibanda, ongene kukhansili yeMangwe emele omama kuWard 4, uvumelana loNkosikazi Moyo.
"Udubo lwamanzi luhamba phambili sihamba umango omude sisiyadinga amanzi izifuyo lazo azilamanzi lamadlelo komule."
Ukhansila kaWard 4, omele omama kubandla leCCC, uNkosikazi Lindiwe Dube, uthi bacela ukugejelwa izibholane zelanga.
"Umango wakithi womile sikhangelele ukuba uhulumende asigebhele izibholane zeSolar ngoba omama baphilanzima bahamba umango omude befuqa amabhala besiyakukha amazi sicela ukugejelwa izibholane duze lamakhaya."
Kasenelinsanga ukuxoxa ngodaba lolu leziphathamandla zikahulumende ezise Gwanda leHarare ngoba bebengaphenduli omakhalekhukhwini. Uhulumende wake wethulela uzulu uhlelo lweGive-A-Dam Campaign, olwasabalala izigaba ezinengi eMatabeleland South. Amanye amadamu asungulwa phansi kohlelo lolu kawaphathwanga ngemfanelo.
Forum