Umqeqetshi weHighlanders uBaltemar Brito uthi usalalo ithemba lokuba iqembu lakhe lizabuyela phezu kwengalane yemiklomelo, eyeCastle Lager Premier Soccer League, lapho eligunyulwe khona ngemva kokunqotshwa kumidlalo embalwa edluleyo.
Iqembu leHighlanders linqotshwe emidlalweni emithathu eliyidlale kumaviki amathathu adluleyo okudale ukuba liphucwe indawo yakuqala engalaneni yemiklomelo ngemva kwesikhathi eside kuyilo ebelikhokhela.
Loba kunjalo umqeqetshi walo uBaltemar Brito uthi ulethemba lokuba lesisimo sizaguquka kusasa lapho abazemukela khona iqembu leYadah emagumeni koBulawayo.
“Sinqotshwe kumidlalo emithathu ilandelana njalo kungaba njalo kusuka kuyethuse abantu kulanxa iqembu linqotshwe kanengi kodwa lokho kwenzakale imidlalo ingalandelani. Siyabathemba kodwa abafana bethu ukuba bazalungisisa njalo sikhangelele ukuba bazabopha ziqine kusukela ngeSonto kusiya phambili,” kutsho uBrito.
Iqembu leHighlanders lilemiklomelo engamatshumi amane lowodwa (41).
Phambilini kokunqotshwa kumidlalo edluleyo iqembu leHighlanders like lakhokhela ngemiklomelo emihlanu phezu kwengalane.
Umgadli waleliqembu uElshamar Farasi uthi kuvele kuyatholakala ukungadlali kuhle ebholeni kodwa bona njengabadlali kabasoze balahle imbeleko ngokufelwa.
“Njengabadlali sivele siyakwazi ukuba umdlalo wenguqu ulempumela ezintathu. Ukunqoba, ukuba ngutshiki lobhanqa, kanye lokudliwa. Okwakhathesi kubi kithi kodwa sizalungisisa njalo impumela enhle izabuya,” kutsho uFarasi.
Imidlalo edlalwe ngoMgqibelo esigabeni seCastle Lager Premier Soccer League iphele kanje; iqembu leBulawayo Chiefs linqobe eleDynamos nge 2 ka 1 ngaseBarbourfields, iCranborne Bullets inqotshwe nge 1 ka nya yiHwange ngaseNyamhunga, iHerentals inqobe iBlack Rhinos 2 ka nya ngaseMandava, iNgezi Platinum ibhaxabule iGreen Fuel nge 3 ka nya ngaseBaobab, kuthi iManica Diamonds itshaye iZPC Kariba nge 2 ka nya ngaseGibbo.
Emidlalweni yangeSonto iqembu leCaps United lizadibana leleChicken Inn ngaseBata, iqembu leTriangle lizemukela eleFC Platinum ngaseGibbo, kuthi iqembu leSimba Bhora lizangqikilana leleSheasham ngaseBaobab.
Forum