UMongameli Emmerson Mnangagwa uthi eleZimbabwe lilizwe elizimeleyo njalo alisoze livumele ukuba amanye amazwe angenele kundaba zalo zomndeni.
Amazwi kaMnangagwa aza ngesikhathi amanye amazwe, agoqela aweAfrica laphetsheya afana leMelika leBhilithani esola ukunqoba kwakhe kukhetho olusanda kwedlula esithi lolukhetho aluqhutshwanga kuhle.
Aza njalo ngesikhathi ibandla eliphikisayo leCCC lisithi lifuna ukhetho lolu luqhutshwe kakutsha njalo lulawulwe zinhlanganiso ezinjengeSadc leAfrican Union.
Ekhuluma engcwabeni weqhawe lesizwe, uMnu Joshua Malinga emathuneni aweHeroes’ Acre eHarare, namuhla, uMnangagwa uthe labo abacabanga ukuthi amanye amazwe angangenela kundaba zeZimbabwe kumbe alitshele okokwenza, bayazikhohlisa.
“Kumele sazi ukuba ilizwe le Zimbabwe lilizwe elizimelyo njalo akula abantu abavela phandle abazakutsho ukuba kumele sizibuse njani”
Amazwi kaMnangagwa asolwe yisikhulumeli seCCC uMnu Promise Mkhwananzi yena othi eleZimbabwe lingeke laphumelela ngaphandle kokuba lisebenzelane lamanye amazwe ikakhulu aweSadc.
“UMnu Mnangagwa kumele azi ukuba ele Zimbabwe lasizwa ngamazwe ahlukeneyo ukuze lifike lapho elikhona. Akula ngenye indlela esizakwenza lutho SADC inganeleanga kukhetho aluqilayo”
Amazwi kaMkhwananzi asekelwe yisikhulumeli sebandla leZAPU uMnu Msongelwa Ndlovu.
“UMnu Mnanagwa kumele azi ukuba ukhetho kaluhambanga ngendlela njalo nxa kunjalo amanye amazwe alakho ukungenela”
Kodwa ohlaziya ezombusazwe njalo esekela ibandla leZANU PF uMnu Teddy Ncube uvumelane loMongameli esithi amanye amazwe kumele azwisise lapho okuphelela khona amandla awo.
“UMongameli uyakwazi ukuba ibandla le ZANU PF lasebenza lamanye amazwe. Amazwe aphandle kawenelisi ukungenela kumsebenzi wethu njengelizwe le Zimbabwe”
U-Mnangagwa uchaze umuyi uMalinga njengeqhawe ebelilwela amalungelo abantu abagogekileyo.
UMalinga wathwetshulwa yingwe ngomnyaka ka1945. Waba lezikhundla ezinengi kubandla leZANU PF ezigoqela ukuba lilunga ledale laphezulu elePolitburo. Wake waba njalo nguMeya wakoBulawayo.
Ngesikhathi ebhubha ubesengumcibisi kaMnangagwa kundaba zabaphila lolubugoga.
Forum