UMongameli Emmerson Mnangagwa uthi ukhetho solwedlule eZimbabwe ngakho-ke sokuyisikhathi sokuthi ilizwe liqhube inhlelo ezitshiyeneyo ezingathuthukisa impilo kazulu.
UMnangagwa wethule amazwi la ngoLwesine eHarare emhlanganweni omkhulu wezisebenzi zikahulumende ezigoqela abaphathintambo benhlangothi ezitshiyeneyo labasekeli babo. Uthi kuqakathekile ukuba abantu benanzelele ukuthi ukhetho olwenziwe ngoNcwabakazi solwedlule njalo uthole usekelo olukhulu olwenze wanqoba ngoba eqhuba inhlelo zikazulu. Utshele abaphathintambo benhlangothi zikahulumende ukuba sokuyisikhathi sokusebenzela uzulu hatshi izifiso zabo.
"Thina abalapha kumele sazi ukuba sisebenzela ukuthuthukisa ilizwe. Ukhetho solwedlula, isikhathi sethu kuhulumende kumele sisincedise ukuba senze okukhulu ukuze ilizwe lethu liphumelele"
Uphinde waqonqosela ukuba kumele kusetshenzwe okuqinileyo lanxa kuza nzima ngoba inkokheli yeZanu PF yafakelwa izijeziso zomnotho ngamazwe angentshonalanga. Utphinda wathi uzazama ngamandla wonke ukuthi uphutshe kahle umsebenzi wokwakhiwa kwedamu leGwayi-Shangani kanye lokuthi kulungiswe umngcele weBeitbridge lowe Chirundu lezinye indawo.
Kodwa umsekeli wesikhulumeli seCitizens Coaltion for Change, uMnu Felix Magalela Mafa Sibanda, uthi uhulumende kaMnangagwa udlala lenqondo zabantu.
"Kuyinhlekisa ukuzwa ubaba uMnangagwa ukuba uhulumende wakhe uzasebenzela abantu. Lapho ubaba uphosisile ngoba uhulumende lo ulabantu abaphongudoha abantu nje. Yikudlala labantu lokhu.”
Isikhulumeli sebandla leZAPU, uMnu Msongelwa Ndlovu, uthi ubukhokheli buka Mnangagwa kabuveli kuzulu ngakho-ke akulanhlelo ezikhanyayo ezithakazelelwa nguzulu.
"Inkokheli ezisebenzela abantu zinkokheli ezivela ebantwini. Inengi lababantu laba baliwa ngabantu. Akula bantu abangamela uzulu. Ufake abantu ukuthi basebenzele yena lebandla lakhe."
Kodwa owalwela impi yenkululeko ekuviyo leZIPRA, uMnu Ethan Matibela, uthi ulethemba ukuba uhulumende kaMnangagwa uzasebenzela luzulu.
"Thina sithi kumele uhulumende asebenze lathi lomuntu wonke ukuze sivuselele impilo kazulu. Sifuna ukuthi sisebenze lohulumende ukuze impilo kazulu ibe ngcono.”
Osakhulayo uMnu Thabani Dube uthi ulethemba ukuba uhulumende uzalungisa indubo ezibhekane labatsha.
"Besicela ukuba uhulumende alungise udaba lwemisebenzi. Imsebenzi kayitholakalai njengabatsha sifisa ukuba uhulumende alungise udaba lwemisebenzi.”
UMnangagwa usanda kunqoba kukhetho olulempumela ephikiswa ngamabandla agoqela eleCCC athi kaluqhutshwanga ngemfanelo. Inhlanganiso ezimbalwa, ezigowela eyeSouthern African Development Community, African Union leye European Union zathi ukhetho olwaqhutshwa kwele Zimbabwe kulwenziwanga ngemfanelo.
Forum