Ikhansili yakoBulawayo ngoMvulo igcobe uMnu. David Coltart ukuba ngumayor walelidolobho esekelwa ngukhansila Donaldson Mabutho kulandela ukuvotelwa kwabo bengaphikiswanga.
UMnu. Coltart, ofungiswe ngumabhalane wakoBulawayo uMnu. Christopher Dube, uthembise ukusebenzela idolobho lokulwisana lobugwelegwele kusukela kumakhansila kusiya kuzisebenzi zekhansili.
"Siqhubekuhle umsebenzi walamhlanje lapho esigcobekhona uMayor, kuviki edlule sigcone amakhansila abangu 29 bavotelwa ngabantu kuthi abayi9 ngabesifazana abangene kuProportional Representation. Ngikhangelele ukusebenza lani lonke okokuqala ngizalwisana lobugwelegwele kuthi lamankampani asebenzela ubulawayo angasebenzi kuhle amagwetha ekhansili azatsho sizabamisa ukusebenza kulandelwa umthetho."
Umsekeli kamayor, uKhansila Donaldson Mabutho, uthembise ukuba uzalandela wonke amasiko edolobho njalo uzasebenza lezakhamizi.
"OMzilikazi bengavuka emancgwabeni uBulawayo uyakhala uColtart uzibalisile inhlupho ezibambe idolobho sihambe sonke silenjongo eyodwa yokuthuthukisa isigodlo sakoBulawayo, Thina sizakuba yikhansili elalelayo, Sizakhupha amabhatshi amabandla sibeke uMayor omela wonke amabandla asedolobheni akubelokubambana esigodlweni senkosi. Singabalamabatha lisiqondise."
Abanye batshayele ihlombe abakhethiweyo kodwa ezinye izakhamizi, ezigoqela uNkosikazi Patricia Tshabalala, zisolile lolukhetho.
"Uma bengakhetha umuntu wokufakwa asisoze sivumelane labo njalo abantu kumele babekwazi ukuthi uBulawayo yisigodlo seNkosi asibuswa ngabantu bokuza."
Ilunga lebandla leZANU PF uKhansila Nokuthula Sibanda, okhethwe ngohlelo lwe proportional representation uthi uyemukela okwenzakeleyo.
"Simtshayela ihlombe uDavid Coltart kodwa kubenzima ukuba sifake owesifazana ngoba thina kubandla lethu sibabili."
Isikhulumi sebandla leCitizens Coalition for Change koBulawayo, uMnu Swithern Chirowodza, uthi ukukhethwa kuka mayor kwakuvele kuhleliwe.
"Sibatshayela ihlomne abangenileyo ukuba bakhokhele ekubuseni uBulawayo okusithokozisayo yikuthi bazalwisana lobugwelegwele njalo akulamuntu ofakwe ngamandla sonke siyazi siseWhite City ukuba uDavid wahlewafakwa engakavotelwa."
UMnu. Coltart ukhethwe nguKhansila Sikhululekile Moyo wasekelwa ngabanye, engekho ophikisayo. Ngemva kwalokhu, uMnu. Coltart ukhethe uMnu. Mabutho laye wasekelwa ngokunjalo. Kusenjalo, amakhansila amanengi lamhlanje ebekhetha abazakhokhela, njalo eHarare uMnu Ian Makone nguye osenguMayor, esekelwa nguKudzai Kadzombe, ongowesifazana wakuqala ukukhokhela esigodlweni. UMqondisi weHarare Residents’ Association, uMnu. Precious Shumba, wamukele ngenjabulo ukukhethwa kuka mayor weHarare lomsekeli wakhe.
"Ngiyajabula ngokungena kukaMayor lomsekeli wakhe njalo okusithokozisayo yikuthi bathembise ukulwisana lobugwelegwele mathupha singakayikhatshana."
Ezinye izakhamizi zeHarare zithi zifisa ukuba kulungiswe uhlopho lwamanzi lokunye.
Forum