Amalunga amadale ePhalamende womabili, abalisa eleHouse of Assembly leleSenate, asuke ezigabeni zawo ngoLwesithathu elubhekise eHarare elanda ukuyagcotshwa ngoLwesine ukuze aqalise umsebenzi.
Ibandla elibusayo leZanu PF lilamalunga alikhulu elilamatshumi ayisikhombisa lasithupha, 176, kudale leHouse of Asembly nxa ehlangene lalawo angene phansi kohlelo lwe-proportional representation kuthi ibandla eliphikisayo eleCCC, lona lilamalunga alikhulu lantathu, 103.
Kudale leSenate iZanu PF ilamalunga angamatshumi amathathu lantathu, 33, kuthi aweCCC wona angamatshumi amabili lasikhombisa, 27. Kulelidale futhi kulezinduna ezilitshumi lasitshiyangalombili, 18, kanye lama-Senator amabili amela abantu abakhubazekileyo.
UMongameli Emmerson Mnangagwa yena ugxotshwe ngoMvulo ngemva kokhetho olusolwa ngabanengi abagoqela abenhlanganiso yeSadc leyeAfrican Union besithi aluqhutshwanga kuhle.
UMnangagwa uzakhetha abaphathintambo bakhe, ama-cabinet ministers, nxa amalunga ePhalamende esegcotshiwe.
Ingcwethi ecubungula ezombusazwe uMnu Effie Dlela Ncube, okhokhela njalo inhlanganiso yabathengi eyeNational Consumer Rights Association (NACORA), utshele iStudio 7 ukuthi akulalutho olumangalisayo olungakhangelelwa nguzulu weZimbabwe kuhulumende omutsha.
Forum