Amabandla aphikisayo kwele South Africa asola uMongameli Cyril Ramaphosa ngokuba yingxenye yomkhosi wokugcotshwa kuka Mongameli Emmerson Mngangagwa ngoMvulo esithi lokhu kutsho ukuthi usekela ukuqilibezelwa kokhetho eZimbabwe.
Embikweni awethulele abezindaba, umkhokheli webandla eliphikisayo kwele South Africa eleDemocratic Alliance, uMnumnzana John Steenhuisen, uthe ukuya kuka Ramaphosa kulo umkhosi kutshengisa ukuthi yena lebandla lakhe leAfrican National Congress bayawusekela umbuso kantando kayiphikiswa eZimbabwe.
Uthe kulihlazo ukuthola eleSouth Africa lijabulela ucuku lokuhlupheka kwabantu beZimbabwe ngesizathonje sokuthi ibandla leANC lifuna ukuthabisa eleZanu PF.
“Kufanele sincedise abantu beZimbabwe ukulwela umbuso okhululekileyo hatshi lokhu okwenziwe nguRamaphosa okukhombisa ukuthi yena lebandla lakhe basekela ukwephulwa kwamalungelo oluntu.”
Kunkulumo yakhe ayithumele abezindaba umkhokheli webandla le Build One SA umnumnzana Mmusi Maimane uthi kulihlazo elikhulu okwenziwe ngumongameli Ramaphosa ikakhulu nxa kukhangelwa ukuthi uhlupho lweZimbabwe seluhlukumeze kangakanani inhlalo yabantu kweleSouth Africa.
“Isenzo sikaRamaphosa lesi lihlazo ebantwini beSouth Africa lasemazweni wonke enhlanganiso yeSADC. Ngeke simise ukuza kwabantu beZimbabwe kuleli singabancedisanga ukuletha umbuso okhululekileyo.”
Kusenjalo, sekubelemibuzo eminengi ngemva kokuba kulenkokheli zeAfrica ezintathu kuphela ezizizele mathupha emkhosini wokugcotshwa kukamongameli Mnangagwa.
Bakhona abathi kuyini okwenze kube lenkokheli ezintathu kuphela kuzwekazi leAfrica jikelele phakathi kwezingamatshumi amahlanu lane (54).
Abanye bathi iyozalwa nkomoni njengoba osaphethe isihlalo senhlanganiso yeSADC umongameli weZambia umnumnzana Hainde Hichilema engezanga kulo umkhosi ngesikhathi iqula leSADC abeliqapha ukhetho lithe kukhona unyawo lwemfene olugcwele indawo yonke kulolukhetho. Umncubunguli wezombusazwe enhlanganisweni yeJustice and Reconcialiation, uMnumnzana Webster Zambara, uthi lokhu kutsho khona ukuthi inkokheli lezi zilemibuzo ngalolukhetho.
“Indlela lezi inkokheli ezenzele ngayo amhlophe umongameli Mnangagwa, lokungezi kwazo mathupha emkhosini wokugcotshwa khwakhe yisibonelo sokuthi kukhona abakusolayo.”
Loba kunjalo, uZambara uthi akukhathalekile ukuthi umbiko weSADC uzathini, njengoba UMnangagwa esegcotshiwe iSADC izakhuthaza ukuthi kukhulunyiswane, kungasetshenziswa dlakela okuyinto okuzaze kuphele iminyaka emihlanu kulokhu kukhulunywa ngayo.
Forum