Inhlanganiso yamagqwetha alwela ilungelo loluntu eyeZimbabwe Lawyers for Human Rights ithi kumele kubunjwe umthetho wokunqabela ukuthunjwa kwabantu kwele Zimbabwe.
Ithi kuzwisa usizi ukuba kusanda kuthunjwa ilunga lebandla eliphikisayo, elitshaywe kabuhlungu ngabacatshangelwa ukuthi basebenza lohulumende ngesikhathi kunanzwa usuku lokuvikela lokhu olweInternational Day of the Victims of Enforced Disappearances.
Inhlanganiso le ithi ukuthunjwa kuka Mnu. Nelson Mukwenha, owebandla leCitizens Coalition for Change othalakele elimele egangeni eMashonaland West ngesikhathi eleZimbabwe liqhuba ukhetho olukhulu, kuveza ukuba eleZimbabwe kalilamithetho ehambelana lokunqabela ukuthunjwa kwabantu. Ithi abanye abathunjwa ngendlela efanayo bagoqela uItayi Dzamara, uPatrick Nabanyana, Paul Chizuze labanye. Iphinde njalo yathi kulemibiko eyavezwa yinhlanganiso yomhlaba wonke jikelele eyeUnited Nations ethi kulabantu abafika phose amatshumi amahlanu – 49 abathunjwa batshaywa kakubi kwele Zimbabwe ngomnyaka ka2020. Kodwa isikhulumeli samapholisa, uAssistant Commissioner Paul Nyathi, uthi ngamanga ukuthi kusanda kuthunjwa ilunga leCCC.
Kusenjalo, abenhlanganiso yezakhamizi, iBulawayo Progressive Residents’ Association, bamanyane labenhlanganiso eyeIbhetshu Likazulu emkhosini wokunanza usuku lokuthunjwa lokunyamalaliswa kwabantu, eleInternational Day of the Victims of Enforced Disappearance. Lolu luhlupho abathi lokhe luqhubekela phambili eZimbabwe.
USenator Tholakele Khumalo uthi kuyamangalisa ukuthi abantu bayanyamalala loba ilizwe lathola uzibuse. Uthi umnewabo, uNicholas Ndebele, wanyamalala ilizwe selithole uzibuse.
"UMnewethu wanyamalala ngesikhathi sekubusa abansundu njalo langesikhathi kubusa abamhlophe abantu babenyamalala. Ngesikhathi ngisebenza ngaphansi kogatsha lwezempilakahle abantu babenyamala lamanje abantu bayanyamalala kungabindabazalutho."
Isakhamuzi sakoBulawayo, uMnu. Sidumo Bhebhe, ubehlengezela inyembezi emkhosini lo, esithi ulezihlobo ezathunjwayo.
"Omalumami ababili uRogder loMoses Mpofu banyamalala, njalo bathathwa ngabantu ababegqoke impahla zebutho kuze kubemanje kusukela ngo1983 asibazi kuhlanganisa lomnewethu owayeselenyanga engodwa eselinde ukuma umsebenzi kubutho lesizwe. Wanyamalalela emsebenzini kodwa wacina esebonakala eStops Camp ngemva kwalokho asiphindanga sambona. "
Uyakhala loMnu. Nicholas Ndlovu, isakhamuzi seSilobela.
"Abanye bami engangithunjwe labo babulawa, ngosuku mina ngimele ngibulawe ababethumba bezwakala bethi bazangithumba ekuseni, abezwa lokho bahlebalala bengazisile, ngalala ngibaleka ubusuku bonke. Ngibuhlungu ngalesisiga kuhle ngabe siyathola ithuba sikhulumisane lalabo abathumbayo ngoba siyabazi bakhona."
UMnu Felix Ndiweni, umngane kaPeter Chizuze, owathunjwa kuminyaka embalwa edlule, uthi babhudula indawo yonke bathola imota yakhe eBeitbridge.
"Imota yatholakala ngemva kwenyanga eziyisithupha eBeitbridge Border Post lapho esasidlula khona nsukuzonke sipaka izimota kodwa uChizuze wathunjwa egedini lomuzi wakhe koBulawayo njalo kuze kubelamanje kaziwa ukuba ukuphi."
Umkhokheli wenhlanganiso yabafundi eyeZimbabwe National Students’ Union, uBenon Ncube, uthi inengi lilamanxeba okunyamalalelwa yizihlobo zabo.
"EZimbabwe kulabantu abanengi abanyamalalayo njalo munye ngamunye wethu sesilomkhuhlane wobuhlungu bokunyamalalelwa yizihlobo kungela ukuthi uzathola impendulo ngokunyamalalala kwabantu ezweni."
Umabhalane weIbhetshu LikaZulu, uMnu. Mbuso Fuzwayo, uthi uhulumende nguye owenza konke lokhu.
"Ezweni wonke umuntu ugcinwa nguhulumende, ngakho ungathola abantu sebenyamalala umlandu umhlaba uwupha uhulumende njalo lokhu kusemthethweni wamazwe omhlaba. Uhlupho yikuthi abantu bebenyamalala ngesikhathi sombuso wabamhlophe lamanje sesizibusa ngesikhathi soombhuqazwe weGukurahundi banengi abantu abanyamalalayo kodwa uhulumende angabi lanyathela alithathayo ukubadinga."
Ibhetshu LikaZulu liphakathi kokuloba amagama abantu abanyamalala kwele Zimbabwe ngesikhathi kusabusa abamhlophe lamanje ilizwe selilozibuse.
Forum