Linqotshwe okwakuqala kumncintiswano walonyaka oweCastle Lager Premier Soccer League iqembu leHighlanders njengoba litshaywe nge 2 ka nya ngeleFC Platinum ngoMgqibelo emini.
Iqembu leHighlanders selikhokhela ngemiklomelo emibili phezu kwengalane yemiklomelo ngemva kokunqotshwa ngele FC Platinum.
Umqeqetshi weqembu leHighlanders uBaltemar Brito ubevele engani uyakuzwa egazini ukuba iqembu lakhe linganqotshwa namhlanje ngoba ekhuthaze abalandeli beqembu ukuba bayemukele impumela yomdlalo loba ingekho mnandi.
“Sikhangelele ukuba abalandeli bethu babekwazi ukuba emdlalweni wenguqu kulempumela ezintathu ezingatholakala ekupheleni komdlalo. Kungenzeka sinqobe, sibe ngutshiki lobhanqa kumbe sidliwe kodwa okusalayo sizabe silokhu siphezulu kwengalane,” kutsho uBrito.
Iqembu leHighlanders lilemiklomelo elitshumi lane lowodwa (41) ngemva kwemidlalo engamatshumi amabili. Endaweni yesibili kuleqembu leNgezi Platinum lona elilemiklomelo engamatshumi amathathu lathoba munwe munye (39) njalo elinqobe eleTriangle nge 3 ka nya NgoMgqibelo emini ngaseBaobab.
Umdlalo obusenkundleni yeLuveve uphele zingutshiki lobhanqa phakathi kweChicken Inn kanye leCranborne Bullets.
Umqeqetshi weqembu leChicken Inn uPrince Matore uveze ukukhathazeka kakhulu ngokwehluleka kweqembu lakhe ukunqoba lidlala lisekhaya.
“Kufana lokuthi silahle imiklomelo emibili ngoba yebo besikwazi ukuthi ngumdlalo onzima kodwa bekumele sisebenzise ithuba lokudlala singekhaya,” kutsho uMatore.
Umqeqetshi weqembu leCranborne Bullets uNesbert Saruchera yena uveze ukusuthiseka ngempumela yomdlalo.
“Ngithabe kakhulu ngoba senelise ukuthola umklomelo owodwa sidlala leqembu elake laphakamisa isicoco seligi. Sifeze umsebenzi omkhulu kakhulu,” kutsho uSaruchera.
Eminye imidlalo edlalwe namhla kusigaba seCastle Lager Premier Soccer League iphele kanje; iqembu leGreen Fuel linqobe eleHwange nge 1 ka nya, iqembu leZPC Kariba libe ngutshiki lobhanqa 0 ka 0 lele Caps United, kuthi iqembu leBlack Rhinos litshaye eleBulawayo Chiefs nge 2 ka nya.
Kusasa ngeSonto iqembu leManica Diamonds lizemukele eleHerentals ngaseGibbo, iqembu leYadah lizadlala leleSheasham ngaseBaobab kuthi iqembu leDynamos lizadlala leleSimba Bhora ngaseBarbourfields.
Forum