Inhlanganiso zamazwe atshiyeneyo ezithumele amaqula ukuzehlola ukhetho lweZimbabwe ezigoqela eyeSADC, iAfrican Union, iEuropean Union, COMESA kanye leCommonwealth, zithi ukhetho lolu alwenziwanga ngendlela elandela umthethosisekelo weZimbabwe, i-constitution, kanye leziqondiso zeSADC ezilawula ukhetho olukhululekileyo.
Amaqula enhlanganiso lezi, ekhuluma lentatheli namuhla ehlukene, athe kunengi okungahanjiswanga ngemfanelo okulakho ukuphazamisa impumela yalolukhetho.
Obekhokhela iqula leSADC oyisizalwane sakweleZambia uMnu Nevers Mumba uthe izimiso zesisekelo sombuso weZimbabwe, iConstitution kanye lezimiso zomanyano lo wamazwe angezansi yezwekazi leAfrica, azilandelwanga ngendlela ekuqhutshweni kwalolukhetho.
Usole njalo ukwethuselwa kwabantu ekade bevota ngamalunga enhlanganiso esekekela ibandla leZanu PF eyeForever Associates of Zimbabwe (FAZ) ngokubhala amabizo abo phandle kwendawo zokuvotela.
"Okunye esakuthola kukhetho kutshengisa ukuba ukhetho lolu alulandelanga isisekelo sombuso, imthetho ye SADC"
ISADC ithe ukusetshenziswa kwemithetho efana loweMantainance of Peace and Order (MOPA) ukuvimba imihlangano yebandla leCCC kubangele ukuthi lelibandla lehluleke ukukhankasa ngendlela kanti lokungethulwa kwe-voters roll ngendlela ebifunwa ngamanye amabandla lakho kubangele ukuthi impumela yalolukhetho ingathembeki.
Lokhu kusekelwe yinhlanganiso yeEuropean Union yona ethi ukhetho lwenzakala kulokuhlukuluzwa kwamalungelo oluntu ngendlela emangalisayo.
Umholi wequla leEU uMnu Fabio Massimo Castaldo uthi ukubekwa kwemithetho efana lePatriotic Act lakho kuphazamise lolukhetho.
"Ukusebenza ko khetho kakuzange kube ngendlela. IZEC kayizange ilandele umthetho okwenza ingalandelwa ngabanengi"
Lokhu kusekelwe yinhlanganiso yeCarter Centre. Okhulume emele iAfrican Union uMnu Goodluck Jonathan uthe imbiko yokwethuselwa kwabantu yenza ukhetho lusolekele.
Kodwa isikhulumeli seZANU PF uMnu Christopher Mutsvangwa, ekhuluma lentathelizindaba, uthe lokhu akusiqiniso, esithi ukhetho lwalonyaka luphume ngendlela enhle.
"Akusomsebenzi womuntu ukuthi azenze yena okhangela umthetho we Zimbabwe. Ku Mumba sithi tshiyana lomthetho we Zimbabwe"
Obona ngokhetho kubandla leCCC uNkosikazi Ellen Shiriyedenga uthi kusobala ukuba ukhetho belungakhululekanga.
"Lokhu kuyasikhathaza sifuna ukuthi besichasisele ukuthi kungani lokhu kwenzakale e Harare, ko Bulawayo lase Manicaland lapho okusekelwa i CCC"
Inhlanganiso lezi zithi zizakupha umbiko ogcweleyo ngemva kwenyanga ezimbili ngesimo sokhetho zisithi labo abangasuthisekanga ngokhetho kabaye emthethwandaba.
Imizamo yokukhuluma leZEC yehlule kodwa uMnu Utoile Silaigwana izolo uthe ukhetho lwaphazamiswa zindaba ezazisemadale.
Forum