Abebandla eliphikisayo leCitizens Coalition for Change bathi bakhathazeke kakhulu ngendlela ukhetho oluqhutshwe ngayo elizweni besithi kusobala ukuba kungake kwaba lempumelo ebalulekileyo. Kodwa inkinga ezibe khona bebezilungele njalo bezimisele ukunqoba lanxa lungaqhutshwanga kuhle lolukhetho.
Lokhu kuvezwe yisikhulumeli seCCC, uMnu. Promise Mkhwananzi, emhlanganweni lentathelizindaba owenzelwe eweteleni yeBronte lamuhla emini. Ulandisa kabanzi uMkhwananzi ukuthi yini abazoyenza ukulondoloza impumela yokhetho elizweni ngendlela elokuthula engeladlakela.
“Sibone ukuthi uzulu uzimisele kakhulu ngokusebenzisa ilungelo lakhe lokuvota, sibakhuthaza njalo ukuthi abayale benjalo. Isibanga lesi esingena kiso yiso esiqakatheke kakhulu esokwelusa ivoti yethu lokuba leqiniso elokuthi into esizivotileyo, impumela yakhona, iliqiniso eyalokho obekufiswa yimuli yeZimbabwe okuyikuthi uAdvocate Nelson Chamisa abe nguye umongameli weZimbabwe lebandla lakhe leCitizens Coalition for Change.”
Kodwa umqondisi obona ngokwethulwa kwemibiko kuZanu PF, umnumzana Farai Marapira uthi kuqakathekile ukuvumela ukhetho luqhutshwe luze luphele.
“Thina asilankinga labeZEC ngoba bebambe umsebenzi omkhulu.”
Umnumzana Martin Million oyisakhamuzi seMabvuku-Tafara eHarare uthi ufisa ukuthi abantu bonke bamukele impumela yokhetho kungaze kwaba lodlakela.
“Akumelanga kube lozondela omunye ngemva kwempumela le.”
Ingcwethi ecubungula ezombusazwe owenhlanganiso yeZimbabwe Democracy Institute uMnu. Bekezela Gumbo uthi okwenzakale kukhetho lwalonyaka kungekuhle emehlweni womhlaba.
“Ukuphuza ukuqala okwenziwe ema-town, ama-urban Constituencies njengeHarare leBulawayo kulemiphumela eyehlisa isithunzi se-Election eZimbabwe.”
Abekomishini ebona ngokukuqhutshwa kokhetho elizweni eyeZEC izolo baxolisile kuzulu besithi kube liphutha okwenzakeleyo ukuthi abantu kwezinye indawo zokuvotela bephuzile ukuqala ukuvota bangezelela isikhathi kulabo abakade bevele bengakaqali ukuvota.
Ngemva kwalolu khetho oluqale izolo lwaphela namhlanje kwezinye indawo ezibe lenkinga abe ZEC bakhangelele ukwethulwa okusemthethweni onqobe kukhetho lokudinga umongameli welizwe Phakathi kwensuku ezinhlanu ezilandelayo.
Forum