Abanye abavukele ukuyavota kukhetho olukhulu eHwange West , eMatabeleland Nort, kabenelisanga ukwenza njalo kulandela ukusweleka kwamabizo abo ku-Voters’ Roll.
Omunye walaba ngosakhulayo uMnumzana Julius Mangena obefuze avote ku Ward 11, ofumane igama lakhe lingekho kuVoters Roll.
“Indaba yikuthi ibizo lami kangilitholi. Ngile receipt eyayithsitshela lapha okufuze ngibekhona kodwa ngiyafika kangilitholi. Lefonini babengitshele kwenye indawo lakho angilitholanga futhi.”
UMnumzana Tabona Ndlovu laye uthi ubhudule waze wabeka phansi kusukela kusempondozankomo laze laya tshona.
“Ibizo nxa ulikhangela efonini litshengisa uChamabondo B Ward. Ngidinge esikolo lesi okwakuqala, ngayadinga kwesesibili ngasengihamba eVobbie ngasengibuya lapha eKings ngaya eGlow Fuel Station ngizama ukukhangela angizange ngilithole ibizo lakhona.”
Ukukhathazeka kwalaba kufakazwa njalo ngunobhala jikelele we Hwange district ebandleni leZanu-PF, uMnumzana Nkosinathi Jiyane.
“Uzathola ukuthi umuntu lapha abevotela khona kuStation A kasekho, mhlawumbe alithole ku B, kulabanye njalo abangatholanga amabizo abo-totally kodwa lokhu kwenza bekhalale, ngihlangane lomunye eMkhosana ethi sedinge five times wacina sesithi sengisiya endlini ukuyazihlalela.”
Okhankasala ukumela iHwange West edale lephalamende ekubandla le Citizens Coalition for Change uMnumzana Vusumuzi Moyo uthi abe ZEC baluma ulimi kungcazelo le.
“Ngikhuluma kanje kuward nine kuthiwa kulabantu abangu 45 abaku hanging ngithe ngibuza kwathiwa ngabafayo, abanye ngabaphuzayo abanye njalo kuthiwa batshiyiwe ngoba batholakala emawadini amabili.”
Ozancintisa loMoyo emele ibandla le MDC-T uMnumzana Somveli Dlamini uthi phezu kwalokhu, emaphandleni ama polling agents ebandla lakhe alelwe ukungena ngesizatho sokwehluleka ukuyabhalisa eLupane.
Abakhankasa beseBinga leNkayi beveze labo njalo uhlupho lokusweleka kwamabizo, kodwa bathi bekungavamanga kangako, njalo isikhathi sokhetho sisungule kuhle kulokuthula.
Imizamo yokuxhumana lokhokhela ikomishini yeZEC, uMnumzana Utuile Silaigwana, yehlule ngoba engabambi umakhalekhukhwini wakhe.
Forum