HARARE -- Umqeqetshi weqembu lenguqu eleHighlanders, uBaltemar Brito uthi kumele kusetshenzwe gadalala ukuze izithelo ezokubuyiselwa kweleZimbabwe emincintisweni lamanye amazwe womhlaba zibonakale.
UBrito utshele intathelizindaba zemidlalo ukuba ukudlala lamanye amazwe sekungaba lithuba elihle elokuba abadlali bakweleZimbabwe bathole amadlelo aluhlaza
“Kulomehluko omkhulu ukuthengisa abadlali abadlala kumncintiswano eyezwekazi laseAfrica lokuthengisa abadlali abadlala belapha ekhaya. Yebo kambe thina besivele sisebenza ngokuzimisela langesikhathi kungela thuba elokuncintisana lamanye amazwe kodwa khathesi abadlali laba sekumele basebenzise ithuba eselikhona ukuba babonakale bathengwe kwamanye amazwe.
Akumelanga kuphelele enkulumeni kuphela kodwa kumele abantu benze kwenzeke,” kutsho uBrito.
Ilizwe leZimbabwe livunyelwe ukuba libuyele liphatheke kunhlelo eziqoqwa yinhlanganiso elawula ezenguqu emhlabeni jikelele eyeFederation of International Football Association (FIFA) ngemva kokumiswa ukuba yingxenye yalinhlanganiso kusukela nyakenye ngoba ukuhulumende ubesetheswa umlandu wokungenela ekuqhutshweni kwalumdlalo.
NgoLwesine olwedluleyo ilizwe leZimbabwe libe ngelinye elifakwe engwaneni kuhlelwa ukuba amazwe awezwekazi laseAfrica azadlala njani kumncintiswano wokudinga amaqembu azakuyadlala kumidlalo yezizwe zomhlaba ozaqhutshelwa kweleMelika ngomnyaka ka2026.
Ilizwe leZimbabwe lifakwe kusibaya sikaGroup C ndawonye leBenin, Lesotho, Nigeria, Rwanda kanye leSouth Africa.
Sikhangele impumela yemidlalo edlalwe namhla kusigaba seCastle Lager Premier Soccer League.
Iqembu leManica Diamonds linqobe eleCranborne Bullets nge 1 ka nya ngaseGibbo, iqembu leFC Platinum linqotshwe nge 1 ka nya ngeleYadah ngaseMandava, iqembu leNgezi Platinum linqotshwe nge 1 ka nya ngeleSimba Bhora ngaseBaobab, iqembu leChicken Inn linqotshwe nge 2 ka nya ngeleDynamos ngaseBarboufields, iqembu leZPC Kariba libe ngutshiki lobhanqa 0 ka 0 leleSheasham ngaseNyamhunga, kuthi iqembu leCaps United linqobe eleGreen Fuel nge 2 ka nya ngaseBata.
NgeSonto iqembu leBulawayo Chiefs lizavakatshela eleTriangle ngaseGibbo njalo umqeqetshi weqembu leAmakhosi uJoseph Sibindi uthi amalungiselelo abo ahambe kuhle kakhulu.
“Ukuthi kuzaphuma ntoni angeke ngitsho ngoba liyakwazi inguqu igiqikela lapho efuna khona kodwa esikukhangeleleyo yikuba singeke sihambe sisithi sifuna ukuyadliwa. Lathi sifuna ukubadla labo bafuna ukusidla yikho ozadlala kuhle nguye ozaphuma lempumela enhle,” kutsho uSibindi.
Iqembu leHighlanders lona lilubhekise eMandava ukuyadlala leHerentals njalo umdlali olihlohlele ngeSonto edlulileyo uAndrew Mbeba uthi ukhangelele ukuba aqhubekele phambili esenza kuhle.
“Ngilezifiso engilazo kodwa angeke ngithi yiziphi ngaphandle kokuthi ngithi ngifisa ukuqhubekela phambili ngiphathisa iqembu ngokupha abagadli amabhola belitshayele emambuleni lami njalo ngihlohle nxa kusenza,” kutsho uMbeba.
Komunye umdlalo wakusasa iqembu leBlack Rhinos lizangqikilana leHwange ngaseBata.
Forum