VICTORIA FALLS - Izizalwane zeVictoria Falls eziphila ngokudobha okulahliweyo zithengisela abakumisebenzi ye-recycling, zikhala kakhulu ngesimo sobuyanga abaphakathi kwaso ngesikhathi isimo somnotho wakuleli siqhubeka sisibalukhuni.
Lobanje izakhamizi, ikakhulu abasesilisa, zisebenza kusakwamalanga kungelampumulo, zithi inzuzo eziyithola eMasuwe Dumpsite kayeneli ukulondoloza impilo zabo.
Bathi inengi labo lenza imali engedluli amatshumi amathathu amadola eMelika - $30 ngenyanga.
UMnumzana Innocent Tshuma, owafelwa ngumkakhe oseleminyaka eyisikhombisa osebenza ukudobha okulahliweyo okugoqela amagabha erabha kanye lokudlekayo, uthi wazithola esesesimeni lesi ngenxa yokuswela umsebenzi.
Uthi ibhele lalokhu balithengisa kusukela kumpondo kusiya ku$7, kodwa limhwatshi ithatha amaviki amabili ukuze igcwale besebethengisela osomabhizimusi beHarare.
“Uhlupho esihlangana lalo yilo olwemali le esikhuluma ngayo lokokusebenzisa ukuthi sibe lamagunboots, amagloves yilo uhlupho olukhona njalo usekelo asilutholi, yithi nje esizama ukuzincedisa empilweni.”
Amazwi kaTshuma agcizelelwe njalo nguMnumzana Mendendala Ndlovu, okhala ngokuthi ibhizimusi yokudobha lokhu isilukhuni ngoba sebebanga ikhulu abasebenza lapha.
Uthi okudliwayo bakudobha njalo lapha nxa imota zengcekeza zibuye zethula, okwabo yikuthenga okufana lempuphu lokunye.
“Vele sihamba lakho ezindlini. Imbhida yonale ngihamba layo endlini konke lamatamatisi, okwami sengikufakile esikhwameni ngoba kuyabe kuright, okufileyo yikho esikutshiyela indwangu. Siyangena enkomponi siding imisebenzi ufice akula uzwe kuthiwa kufuneka imali ukuthi uthenmge umsebenzi manje siphile njani, yikho sikhetha ukuzibyela ngapha kuphela.”
Omunye njalo odobha okutshiyeneyo endaweni le nguMnumzana Jabulani Ndebele, oseleminyaka phose engamatshumi amabili ekulindawo. Uthi kala aziqhenya ngakho asekutholile okufana lemfuyo ngesizatho sobumpofu obulapha.
Uthi akwenelisayo yikunakelela abantwabakhe abane lomkakhe.
“Impilo inzima, imisebenzi kasiyiboni, kusebenza abawuthenge ngemali yikho okwenza sihle sizoyidinga nga. Nxa ngingadobha imali khonapha ngiyahamba ngiyethenga umsebenzi manje angiyitholi imali yakhona.”
Osakhulayo uJeremiah Ndlovu, oleminyaka yokuzalwa engamatshumi amabili lane - 24 uthi useleminyaka emithathu ekulindawo eqhuba lumsebenzi kodwa kala lutho oluveza lokhu. Laye uthi uselemuli ekhangelele kuye.
“Ngenyanga ngiyabamba kumbe $40 ngoba lababantu abavele eHarare bezothenga ngapha, bathenga ngokuzimali okuncane.Yikusebenzala impumphu kengela property, lenguba uyehluleka ukuthi uyithenge ngoba imali yakhona incane kakhulu. Besifisa ukuthi nxa singalethelwa imitshina ukuthi lathi sibesizigayela khona izinto zethu zingayi eHarare ngoba siyabulawa yitransport ukuthi sikuthwale. ”
Ujaha lo uthi bafisa njalo ukuthi uhlangothi lukahulumende olubona ngezamabhizisi lubaxhase langemitshina yokubumba okufana lamabhodo ayiwo asevame ukwenziwa ngama gabha amanamunede. Omunye njalo osakhulayo, uShingirai Makunze, owaqala lumsebenzi ngomnyaka ka2018, ukhala laye ngokuswela okokuvikela imikhuhlane kanye lamanzi ahlanzekileyo.
“Izinto eziyiproblem ngamagloves, izicathulo lamanzi, asilamazi lapha esisebenzela khona.Siwadinga khathshana.”
UNkosikazi Sithembiso Nyoni, umphathintambo obona ngezabesifazana lezamabhizimusi, uxwayise abantu laba ukuba baxhumane lewofisi yakhe uma befuna uncedo lokuzithuthukisa.
“Ngiyabacela omama ngiyabancenga ukuthi kabahambe bayedinga izimali bangaba le any problem bangidinge, mina ngile open door policy ngiyabaphendula ngibancedise ngoba silesifiso ukuthi sibabone lathi besenza izinto eziyakwenza ukuthi bathole imali.”
Abe Zimstat kuphenyo lwabo lwalonyaka babike ukuba inani labayizigidi phose ezintathu - 2.8 million kwele Zimbabwe kalisebenzi bengeza njalo ukuba inengi lalaba livela esabelweni seMatabeleland North. Imizamo yokuxoxisana lomqondisi wezakhiwo uMnumzana Brain Nyamande asebenzela iVictoria Falls City Council yehlule ngoba ebike ukuba ubambekile kakhulu. Kodwa ikhansili le ibika ukuba sebesungule uhlelo lokwakha indawo yeMasuwe Dumpsite ngezinga eliphezulu elizakwenza ukuthi ingcekeza ingasabalali yonke indawo.
Eminye njalo imizamo abayenzayo eyokuvikela laba bantu ukuba bengabambi imikhuhlane, igoqela ukufafaza njalo nje ngemithi ebulala okufana lempukane.
Forum