HARARE -- Kulabasekeli bebandla ele Citizens Coalition for Change, abathathu ababikwa betshaywe kakubi balimala, emangweni owe Maungwa ngabanakanelwa ukuba ngabasekeli be ZANU PF.
AbeZanu PF, babikwa benze lokhu, ngenjongo ykuphazamisa ukuqhubeka komhlangano wabeCCC okade ukhokhelwa ngumnumzana Nelson Chamisa.
Ekhuluma emhlanganweni lo, owe Maungwa uChamisa uthe ibandla lakhe kalisenelisi ukukhankasa likhululekile ngoba libhekana lemigoqo etshiyeneyo egoqela ukumiswa kwemihlangano yebandla endaweni ezinengi zelizwe.
Umsekeli wesikhulumeli se CCC, uMnu. Ostallos Siziba uthi kusobala ukuba ibandla le ZANU PF selisesaba ukuncintisana lebandla lakhe.
“Namhlanje umhlangano wethu uvinjwe ngabasekeli bebandla le ZANU PF loba nje ucine uqhubekela phambili kodwa kuyakhanya ukuba bayasesaba njalo kabafuni senze imihlangano yethu”
USiziba uqhubeke esithi amapholisa amise njalo omunye umhlangano wabo obe kumele wenziwe e Bindura wokuphawula umklhankaso wabo wokudinga usekelo ekhethweni lwalonyaka.
“Sizaqhubeka ngomhlangano wethu nge Nsonto kungelani lalokho okutshiyo ngamapholisa. Siyazi ukuba basetshenziswa libandla le ZANU PF ukuzama ukwenqabela umsebenzi esiwenzwayo”
Kodwa ilunga ledale laphezulu eleCentral Committee, kuZANU PF, uMnu Mabutho Moyo uthi abeCCC kabakhulumi iqiniso njalo bangamagwala.
“Bayazama ukucatsha ngomunwe kodwa kusobala ukuba kalandeli umthetho. Kusobala a ukuba ngama gwala awesaba ukukhetho. Sizabanqoba kukhetho kungelani lalokho abakutshoyo. Kasisoze sitshaye abantu njalo abakutshoyo ngamanga”
Encwadini elotshwe ngamapholisa aweBindura, isiya kwabeCCC, athe indawo abakade befuna ukwenzela umhlangano eyeBrockdale Pfugari Open Space, kayilungelanga ukwenzelwa umhlangano ngoba ingela zakhiwo lemigwaqo, ukungenza kube nzima ukuthi kungaqhamuka udlakela amapholisa enelise ukuzolamula.
Amapholisa athi njalo abeCCC abazange babazise kusese lesikhathi ngalumhlangano ukuze benelise ukuthumela abanye babo ukuyalondoloza ukuthula lokuvikela inkokheli yebandla lozulu nxa kuthe kwaqhamuka udlakela. Kodwa lokhu kulandulwe ngabeCCC besithi bazisa amapholisa emaviki amathathu adluleyo kodwa baze baphendula namhlanje umhlangano umele wenziwe ngeSonto.
Isikhulumeli samapholisa uAssistant Commissioner Paul Nyathi, utshele iStudio 7, ukuthi imvumo yokuqhuba imihlangano emikhulu yamabandla ezombusazwe eyamaRally, iphiwa ngama District Commanding Officers, nxa kwehlule baye kuskomitshi wamapholisa elizweni jikelele, laye kungehlula balelungelo lokuya emthathwandaba.
Forum