VICTORIA FALLS -- Abakumsebenzi wokuthokozisa uzulu abagoqela abaculi, imbongi labanye abasesabelweni se Matabeleland North, bakhala ngokuswela uxhaso kuhulumende lakwezinye inhlanganiso ezizimeleyo, ukuze benelise ukuthuthuka kulumsebenzi bathole inzuzo yokuziphilisa ngasikhathi sinye befeza isifiso sokuthokozisa uzulu lokulondoloza amasiko.
Lokhu kuphume emhlanganweni wemfundiso oqoqwe ngabenhlanganiso yezamalungelo abaculi eyeZimbabwe Music Rights Association (ZIMURA), obuthanise abakumsebenzi wokuzithokozisa eChinotimba Hall, eVictoria Falls.
Umculi uObert Dube oyimbongi ezalwa eLupane yena ukhala kakhulu ngokusweleka kwamathuba okuthuthukisa abakulumsebenzi, esithi lokhu kudala ukuba amasiko oluntu lwasesisabelo aqhubeke elahleka ngoba kungela ngitsho lamawofisi kule indawo abangaya khala khona.
“Abantu bekhaya bancindezelwe kakhulu, ngabe kusebhoreni ngabe kungaphi, abalazo indawo zokuthi bayekhanyisa imisebenzi yabo ukuze ikhule igqame bathole ukudla etafuleni. Okunye okukhona yikuthi amawofisi awe ZIMURA akhatshana koBulawayo njalo iNational Arts Council loba besenza loba yikuphi baya koBulawayo so silokho thina sicwaswa ngokokuhlala okuthiwa ngolimi lwemzini yi marginalization, akukabilento eseduze lathi.”
Umculi weMbube waseVictoria Falls, uSibangilizwe Sibanda umholi weqembu elizibiza ngokuthi ‘Buntu Bomuntu’ ukhala ngokuthi abaculi abanengi balesisabelo bayatshiywa phandle emincintiswaneni njalo nxa kulemicimbi emikhulu edolobheni leli kabamenywa.
“Sifuna ijustice ukuthi iBulawayo kufuze iziphathele okwabo lathi sizenzele okwethu ngoba njengalapha eVictoria Falls kule cultural diversity engeke ifanane leyeHarare leyeBulawayo. Silemihlobo yonke lapha ekwanisa ukwenza okungeke kukhitshwe yiHarare kumbe iBulawayo.”
Lokhu kusekelwe nguThokozani Dube odabuka emangweni waseNswazi ongumholi weqembu le ‘Mkhankaso Wamajaha’. Yenake uthi ukubandlululwa kwabaculi belesisabelo kusezingeni laphezulu.
“Asikhangelwa, sikhangelelwa phansi. Uzananzelela ukuthi abanye siyacula, sicula okufanayo mhlawumbe ubedlule wena nge seniority, kodwa uzathola ukuthi ngenxa yohlobo abanye baphiwa imali ngeUS$ abanye bephiwa nge RTGs, yizo izinto ezisihluphayo kakhulu. Nxa kusiba lamanationa events asithathw kubuyama band evela eHarare, Bulawayo. Umuntu ongangami esiyahlabela kufakwe ingcwebethu phambili, kuyayangisa kodwa mina ngiyakwazi engikwenzayo njalo kulesisindo .”
UNkosikazi Nokukhanya Moyo wohlangothi lukahulumende olwe National Arts of Zimbabwe uthi isabelo lesi sinothile kakhulu ngabakumsebenzi wokujabulisa uzulu abagoqela abaculi, inguqu, imbongi labanye.
“Ukubakhona kwabo bafuna usekelo lwethu, into eluhlupho yikuthi bayaswela imali kathesi, kodwa silama partners afana le Culture Fund bayabapha imali njalo bona kufuze bencedisane ukuphakamisa”
UMnumzana Henry Makombe wenhlanganiso yeZIMURA, uthi bananzelele ukuthi abakulumsebenzi kabawazi umthetho obasekelayo lamalungelo abo, ngakhoke bakubone kufanele ukuqhuba lumhlangano wemufundiso kulumango.
“Iworkshop le iqakathekile ebantwini balapha ngoba sifisa ukubanikeza amandla ukuthi bebekwazi ngelungelo labo njalo bethole inzuzo kumisebenzi abayenzayo.”
AbeZIMURA bathi uhlelo lwabo lolu kalupheleli eMatebeleland North kuphela kodwa baqoqe ukuthi baluse ezigabeni zonke zelizwe kusiyafika ekupheleni kwawonalumnyaka.
Umhlangano wanamhlanje ubuthanise abakumsebenzi wokujabulisa uzulu abavele eLupane, Binga, Hwange lezinye indawo eziduzane leVictoria Falls, emangweni weMatebeleland North.
Inengi labangene lumhlangano bakhuthaze abeZIMURA, abenhlanganiso ezizimeleyo, osomabhizimusi abasebenzela kulindawo lohulumende ukuba basondele eduze labo basebenze ndawonye ukuthuthukisa lumango.
Ekugqitshweni, kwalumhlangano wemfundiso, abakulumsebenzi abakade bekhona baphiwe izithupha zokuqeqetsha ngokwazi imithetho esekela imisebenzi yabo.
Forum