JO0HANNESBURG -- Umthethwandaba wePretoria High Court kweleSouth Africa usulahle isinqumo sikahulumende weSouth Africa sokumisa ukusebenza kwengwalo zokuhlala lokusebenza kweleSouth Africa ezeZimbabwe Exemption Permits.
Kusinqumo esethulwe lamhlanje, umthethwandaba uthe isinqumo sogatsha lwendaba zasekhaya sokwesula amapermit eZEP lokuqhubeka isengeza ukusebenza kwawo okwesikhatshana kasikho emthethweni ngakho sesesuliwe.
Ithe ukwesulwa kwamapermit la yikwephulwa kwesisekelo sombuso ngoba akukhulunyiswananga lezizalwane zeZimbabwe lezi okuyikwephula umthetho lelungelo labo njengabantu abasebenze bethuthukisa umnotho walelo lizwe bebhadala lemithelo kahulumende.
Unkosazana Naseem Fakir owenhlanganiso ye Helen Suzman Foundation eyiyo ebihamba phambili kwabaphikisa isinqumo sikahulumende lesi emthethwandaba, uthi bathokoze kakhulu ngokunqoba kuloludaba.
“Lesi sinqumo sizasiza izizalwane zeZimbabwe lezi ukuqoqa kuhle impilo zazo.”
Umgcinisihlalo wenhlanganiso yeZimbabwe Community in South Africa umnnumnzana Ngqabutho Mabhena laye useyemukele ngenjabulo lesisinqumo.
“Esikukhangeleleyo khathesi ensukwini ezilandelayo yikuthi sithole umhlahlandlela wokuthi kuzahamba njani kulabo abavele sebefake isicelo sabo sama waivers ngoba isinqumo sikaminister esichithwe yinkantolo yikuthi abantu kumele bayekwamanye amapermit okufunakala khona ukuthi umuntu abe lewaiver.”
Unkosazana Victress Mathuthu, okhokhela inhlanganiso yabomama beZimbabwe eyeZim Imbokodo uthi behlisa iphika ngalesi sinqumo.
“Sesilinde ukuthi sikuzwe ukuthi kulezo nyanga ezilitshumi lambili uAaron Motsoaledi kumele abe esekhuphe isinqumo esingayisiso lesi ukuthi uyaqeda du ama ZEP. Njalo bonke abantu abalamaZEP ngicabanga ukuthi kuzindaba ezinhle ukuthi ekucinengi inkantolo icine isivune labo abakade bephikisana lomphathintambo Motsoaledi.”
Kodwake umnumnzana Freeman Bhengu owenhlanganiso ye Sisonke Peoples Forum, osekukade isekela ukwesulwa kwamapermit la uthi isinqumo lesi sibadanise kakhulu.
“Sizayichallenger leyo decision by the high court, by i judiciary, by i ANC evumela yonke into ewrongo eyenziwa yiZanu pf, aboMugabe, laboMnangagwa bazoyenza yonkinto abayifunayo la eSouth Africa. Asivumelani nayo, asiyithandi and ngeke siyivume siyiyeke isenzakala.”
Ingcitshi kwezomthetho umnumnzana Vusumuzi Sibanda uthi isinqumo lesi sitsho ukuthi umphathintambo wogatsha lwendaba zasekhaya umnumnzana Aaron Motsoalaedi kufanele ayeqala olunye uhlelo olutsha olulandela umthetho.
“Kutsho khona ukuthi kufanele ukuthi aqale phansi ukuthatha lesi sinqumo sekungaze kungathi kungo2021. Anxuse amaZEP holders ukuthi bamtshele ukuthi lesi sinqumo sizahlukumeza amalungelo abo ngaluphi uhlobo njalo bacabanga ukuthi kwenziweni?”
Phakathi kwenyanga ezilitshhumi lambili lezi abeZimbabwe laba ngeke babotshwe kumbe ukubuyiselwa emuva ngezizatho zokuthi amapermit abo asephelelwe yisikhathi. Isikhulumeli sikamphathintambo Motsoaledi umnumnzana Siya Qoza utshele abezindaba ukuthi umnumnzana Motsoaledi uzacwayisisa isinqumo somthethwandaba engakaphawuli ukuthi uzokwenzenjani ngaso.
Forum