BULAWAYO -- Abakumabhizimusi amancane laphakathi laphakathi, namhlanje bamanyene labenhlanganiso yomanyano oweEuropean Union, abeEmpretec, eyeWelt Hunger Hilfe lohulumende weZimbabwe benanza ilanga ele International Day of Micro Small to Medium Enterprises.
Amabhizimusi amancane aseZimbabwe okwamanje abikwa eqhatshe abantu abedlula izigidi ezinhlanu-5 million akhuthazwa ukuba alungise impahla elohlonzi ukuze benelise ukuyithengise emazweni aphetsheya kolwandle.
UMnu Minenhle Ngwenya weWelt Hunger Hilfe esebenzelana leEuropean Union uthi baphakathi kokusebenzelana lohulumende weZimbabwe ekuhlomiseni amabhizimusi amancane.
“Kusukela ngomnyaka ka2012 iEU leZimbabwe benza isivumelano sokuthi amabhizimusi akuleli a athole imali yakwamanye amazwe ngoba bedinga kakhulu impahla yakuleli eyemvelo."
UNkosazana Sibusisiwe Bango umqondisi weEmpretec uthi basebenza gadalala ekuhlomiseni amabhizimusi akuleli ukuthi athuthuke.
"Kuyajabulisa ukubona amabhizimusi esisebenzelana lawo eseqala ukuthi ayethengusela impahla zabo emazweni aphetsheya kolwandle njalo bethola losekelo lweEU lohulumende."
UNkosazana Nobuhle Mazalu umqondisi weBack to Basics obesembuthanweni walamuhla uhlomisa osomabhizimusi ukupha uhlonzi kuzilimo zabo.
"Sisebenza labalimi emakhaya lemadolobheni sibahlomisa ngokufaneleyo ukuthi bayethengisa impahla ezilohlozi besiyazithengisa phetsheya kolwandle."
UNkosikazi Providence Moyo umqondisi we Devine Pro Skin Care ubebukisa impahla yakhe kulumkhosi walamuhla uthi wancedwa nguhulumende weMelika ekukhuliseni ibhizimusi yakhe.
"Sengiqalile ukusebenza leZimtrade leZimra ukuba ngiyethengisa inamunede yami yomkhomo lamafutha kumazwe aphetsheya kolwandle ngaphansi kohlelo lweShe Exports."
Umphathintambo weMicro Small to medium Enterprises uNkosikazi Sithembiso Nyoni uvule lumhlangano okusemthethweni ekhuthaza osomabhizimusi ukuthe bayethengisa impahla zabo eEU.
"Ucwaningo olwenziwa yiZimstats lwaveza ukuba ezomnotho olethwa ngamabhizimusi ethu azimeleyo adelelekayo asipha amabhiliyoni amanengi ngakho okwamanje sengilikhuthaza ukuthi libambane labanye asebeqale ukuyathengisela amazwe aphetsheya kolwandle eEU ukuze likhule kumabhizimusi libe lenzuzo."
Amankampani amancane edlula ikhulu ebebukisa impahla yabo asebelungele ukuyayithengisa emazweni agoqela akumanyano oweEU.
Ukuvalwa kwamnkampani amakhulu kulandela ukuma manzonzo komnotho welizwe lezijeziso zomnotho izizalwane zeZimbabwe sezasungula amabhizimusi bezimele kuthi uhulumende laye sewadala izikhwama emabhanga ahlukeneyo emizameni yokuhlomisa mabhizimusi la ukuze bayenelise ukuyathengisa kwamanye amazwe.
Forum