HARARE - Ikomoshini ebona ngezokhetho elizweni eyeZimbabwe Electoral Commission (ZEC) isibike ukuba kusasa ngo 10 ekuseni, izavula iminyango yedale lalabo abafisa ukubhalisa ukuncintisa kukhetho lwalonyaka, amaNomination Courts, azavalwa ngo 4pm emini yantambama.
Ekhuluma lentathelizindaba e Harare, namhlanje, umholi weZEC, uMnu Utloite Silaigwana uthe ikomishini yakhe isilungele ukhetho lwalonyaka.
UMnu Silaigwana uchasise ngamaphepha afunakalayo kulabo abafuna ukuncintisa kukhetho lwalonyaka.
"Kulabo abafuna ukuncintisa kusasa idale le nomination court lizavulwa kusasa ngo 10am livalwe ngo 4pm ntambama.”
Uqhubeke esithi inhlanganiso yakhe izakupha bonke abancintisayo ugwalo loluhlu lwamagama abalelungelo lokuvota olweVoters Roll.
“Kulabo abazaphumelela ukubhalisa amabizo abo sizabanikeza ugwalo lwe voters roll oluhambelana lendawo lapho abafuna ukuncintisa khona."
Amabandla ezombusazwe athi asemelele uhlelo lwakusasa esithi azabhalisa amabizo alabo abafuna ukuncintisa bewamele.
Obona ngezokhetho kuCCC, uNkosikazi Ellen Shiriyedeng,a uthi ibandla lakhe selilungele ukhetho.
"Sesilungele ilanga lakusasa kungakhoke kulabantu abazabe bekhangela ukuba amaphepha lawa alungele ukuze amiswe e nomination court.”
UMnu. Mabutho Moyo owebandla le ZANU PF uth ibandla lakhe selilungisile wonke amaphepha alo.
"Ibandla le ZANU PF yilo ibandla elilungele ukhetho asenze okukudlala. Lizabona okuzakwenzakala kusasa ngesikhathi sinekeza amabizo ethu kudale le nomination.”
IZEC ithi isithole amabizo abanye babazabhalisa kusasa kukhetho lokudinga umongameli, abagoqela uMnu Nelson Chamisa owe CCC, lelika Mongameli Emmerson Mnangagwa ozancintisa emele iZANU PF.
IZEC ikhuthaze uzulu we ZImbabwe ukuba avote ngokuthula esithi kumele umuntu wonke alandele inkuthazo kaMongameli welizwe eyokuba kuvotwe ngokuthula.
USilaigwana uthi kulabantu abadlula izigidi eziyisithupha- 6 million ababhalise ukuvota kukhetho lwalonyaka.
Ukhetho lwalonyaka ngelokudinga umongameli, amalunga edale lephalamende laweSenate, abazamela omama, abazamela abatsha, abazamela izinduna labazamela abakhubazekileyo kanye lamakhansila.
Abafuna ukuba ngo Mongameli amaphepha abo azahanjiswa edale le High Court e Harare, kuthi abafuna ukuba ngamalunga edale lephalamende bazakusa amaphepha edale likaMantshi.
Forum