HARARE - Ikhomishini ebona ngezokhetho iZimbabwe Electoral Commission ikhuthaza abazancintisa kukhetho olukhulu oluzaqhutshwa mhlaka 23 Ncwabakazi ukuba balungise masinyane amaphepha abo azahlolisiswa lidale leNomination Court ngeviki ezayo.
UMnu. Rodney Kiwa, isikhulumeli seZEC njalo ongumsekeli wekhomishini le, utshele umsakazo weStudio 7 ngoMvulo ukuba kuqakathekile ukuthi abazancintisa belungise kahle amaphepha abo kusese lesikhathi kungakafiki umhlaka 21 Nhlangula.
UKiwa uthi labo abafuna ukuncintisa balakho ukuhambisa amaphepha abo kungakafiki usuku lolu.
UKiwa wethule inkuthazo le ngesikhathi ibandla leZANU PF liyilo lodwa eselivezele uzulu amagama abazancintisa kukhetho lwamakhansila, alwamalunga edale lephalamende kanye loluka mongameli.
UMnu. Admire Masikati, okuhlangothi lwabatsha kubandla leli, uthi bazalungisa amaphepha abo ngendlela efunwa yiZEC.
Amabandla aphikisayo akhanya elokhu edinga azawamela kukhetho oluzayo. Kodwa athi azahambisa amaphepha kudale leNomination Court ngendlela ehlelekileyo ngeviki ezayo.
UMnu. Kudakwashe Zulu, okubandla leAlliance for the People’s Agenda, uthi sebelungisa amaphepha abazawahambisa eNomination Court.
UMnu. Hebert Chamuka, owebandla lePeople’s Unity Party, uchasise ngamalungiselelo ebandla lakhe.
Amabandla phose wonke aseqalile ukukhankasela ukhetho olukhulu oluzayo.
Forum