BULAWAYO --Ibhanga elikhulu lelizwe eleReserve Bank of Zimbabwe namhla lazise uzulu ukuthi isilinganiso sedola leZimbabawe sesizahlelwa yikusebenza kwalo kungela kulawulwa libhanga leli.
Ngemva kokwethulwa kwalumbiko isisindo sedola leZimbabawe sihle sakhuphuka saya kunkulungwane hose eziyisithupha(ZW$5,700) nxa liqathaniswa ledola linye eleMelika kuthi izitolo lazo zahle zakhweza intengo yempahla.
Unkosikazi Thandeka Dlodlo usomabhizimusi wakoBulawayo uncoma isinqumo sokukhitshwa kohlelo olomkhambo owe Auction System.
“Isinqumo lesi sokuthi ama rates alandele ama market forces sinqondile kakhulu. Ngeke sithenge i USD lokuwoda ngentengo ephezulu sizothengisa nge rate ephansi, siyabe sesisukile kunjongo yokungena kubhizimusi. Ngibona engathi lama prices lawo sezakuma ukuqansa njalo nje ngoba sekungasela i blackmarket rate ebiyiyo esilawula i economy. Kithi kubhizimusi sikubona kuyisinqumo esihle, esizadala ukuba sisebenze singela valo lokuthi uyathi susiwawoda uthole sekukhwelile.”
Unkosikazi Melody Mthupha isakhamuzi sakoBulawayo uthi indlela osiphatheni abenza ngakhona kuyabaphambanisa bacina besala bengela lutho.
“Okukhona ngamaexchange rate kubuhlungu ngoba nxa uholile kuyirtgs ukuthi uthole iUSD kunzima ngamarates akhona usala ungela lutho.Nxa sesikukhangelisisa sekungani ku political okuyinto enzima njalo ebuhlungu kuzulu ongaholiyo iUSD olithengayo kubosiphatheleni abalama rate atshintsha nsukuzonke njalo omunye lomunye ileyakhe.”
Umnumzana Ryan Siziba umhlali wakoBulawayo uthi okwenze ukuba i Auction System ingasebenzi yikuthi uhulumende ubengenelisi ukuthi afake imali yaphandle kwelizwe eyanelayo emkambo, kungakho uzulu ubesephephela kubosiphatheleni.
“Uhlupho okade luvele lukhona yikuthi uHulumende kade evele engenelisi ukuthi efake imali yangaphandle eyaneleyo kuAuction system leyi. Yikho abantu bebesilela ngokuthi behambe beyedinga imali emkambo omnyama obekuyikho obekutholakala khona Imali. Njalo abamabhizimusi abanengi be ethi nxa bedinga imali leyi behambe beyeyidinga emkambo omnyama kube sekusiba labantu abanengi abayifunayo. Yikho kusenza ukuthi i Rate ikhuphuke kakhulu ngoba uHulumende enganelisi ukuthi asuthise umkambo ngemali.”
Umnunzana Stevenson Dlamini ingcwethi kwe ezomnotho lamabhizimusi njalo efundisa ngezomnotho eNational University of Science and Technology (NUST) uthi ubuhle bokusebenzisa intengo elandela ukumkambo buyikuthi kuzehlisa ukutshiyana kwentengo yokuthenga imali yaphandle ebhanga layeyi esemkambo omnyama, okutsho ukuthi umnotho welizwe awuseyi kulawulwa ngumkambo omnyama.
“Imali yakithi nxa iqathaniswa leyamanye amazwe isizathengiseka emkambo osemthethweni, okutsho ukuthi amabhanga asezaba lelungelo lokuthengisa imali yakwamanye amazwe njalo isisindo semali yakithi sesiza determiner yi market lokhu kukhangelelwe ukuthi kwehlise ibanga eliphakathi kwesisindo kwemali yakithi okusemthethweni kuqathaniswa laleyi esemsikeni ongekho emthethweni. Ukuvunyelwa kwamabhanga ukuthi bathengise imali yakwamanye amazwe kutsho ukuthi abantu abasena kuya emkambo ongekho emthethweni.”
I-RBZ yethule umbiko izolo iveze izinqumo zokuzama ukulungisisa isimo sokuwa kwesisindo sedola leZimbabwe kanye lomnotho welizwe. Izinqumo lezi zigoqela ukuyekela isisindo sedola sihlelwa ngumkambo, ukuvumela amabhanga ukuthi athengise imali yakwamanye amazwe ngentengo ehlelwe ngumkambo lokunye. Lokhu kuza ngemva kokuba idola leZimbabwe liqhubeka lisiwa isisindo nsuku zonke ngesiqhubu esethusayo kuthi intengo ezitolo layo ikhuphuka njalo nje.
Forum