HWANGE - Izakhamizi lenkokheli yemangweni weLubangwe esigabeni seHwange zikhala ngohlupho lwendlala, ukuswelakala kwamaphilisa lezakhiwo zezempilakahle kanye lamanzi.
Izakhamizi lezi, inengi lazo ngezahlaliswa kulindawo yeLubangwe Railway Farm 55 ngomnyaka ka2000 kusabusa owayengumongameli uRobert Mugabe, owasusa abamhlophe emapulazini la lamanye elizweni lonke jikelele, ezama ukunika umhlabathi abansundu.
Kodwa inkokheli yesigaba lesi yathulele lumsakazo ukuba ngemva kokuhlaliswa lapha, ziyanda inhlupho ezigoqela ukuswelakala kwekilinika lamaphilisi, ukudla kanye lamanzi ngenxa yesimo sokuguquka komkhathi - -climate change - lokunye.
UNkosikazi Nesa Mpala, usobhuku weVillage 2, uthi uhlupho lokuswelakala kwamakilinika lufaka omama abakhulelweyo engozini, kanye labalemikhuhlane efana leTuberculosis leminye.
Ukuthola ukwelatshwa, izakhamizi lezi sihamba umango odlula amakhilomitha alitshumi lantathu zisiyabamba eNdlovu Clinic.
“Abakhulelweyo bona bahlupheka kakhulu ngoba lemali yokuya ezibhedlela ukuyahlolwa bayabe bengelayo njalo lokubabelethisa emakhaya sekunzima ngoba akuvunyelwa. Besicela ukuba ngabe siyasizakala ngama mobile clinics labodokotela basondele ngoba abahlupheka kakhulu njalo ngabalomkhuhlane we TB ngoba labo kabatholi usizo.”
UMnumzana Edwin Nyoni, usobhuku weVillage One, uthi kunengi okuhlupha abantu esigabeni lesi. Uthi emasimini kabavunanga lutho ngenxa yenyamazana zasendle ezifohla emadlelweni azo agcinwe ngabe Zimbabwe National Parks and Wildlife Management Authority.
“Ziyangena emasimini, nxa sithole okulutshwane khonokho, siyangena futhi sibuye singasavuni.”
Ukhale ngokuthi aluba uhulumende uyangenela abantu bafundiswe ngendlela ezintsha zokulima.
Amazwi akhe agcizelelwe nguMnumzana Gilbert Munkuli, laye ongusobhuku weVillage 2, othi bathwele nzima.
“Silohlupho lwenyamazana zeganga. Indlovu ziyangena emasimini loba silime kuhle, ziyabuya zidle kudala indlala. Abalutshwana bavunile, kodwa indlovu zisibulele ngobunengi bazo. Thina njengamasabhuku, sikhangelele ubaba uhulumende ukuthi ancedise ngokudla sokunika abantu lapha badle.”
Umphathintambo wesabelo seMatabeleland North, uMnumzana Richard Moyo, uthi sebezizwile izikhalazo zezakhamizi lezi.
“Amarig ahambe last week, ngizadinga ukuthi sekuhanjwe okungakanani ngoba siku workshop yama candidates’ eGweru kodwa ngizadinga abeZinwa. Sikhulume ngakho, sebemnika ireccomendation uPresident ukuthi kungenzelelwa ngoba unika 10KG, so sithe kungezelelwe banikwe ama 50KG amabili ngomuzi."
Ezinye njalo izakhamizi zikhale ngokuswelakala kwemigwaqo lamanzi emifuleni osekubangele ukufa kwezifuyo kanye lokuphunza kwezimithiyo.
Forum