Izizalwane zeZimbabwe kwele South Africa ezilamapermit eZimbabwe Exemption Permits zithi zikhathazeke kakhulu ngokungethulwa ngesikhathi kwesinqumo somthethwandaba sokuthi bayahlala loba bayahamba mhlaka 30 Nhlangula okulilanga lokucina lokusebenza kwamapermit abo.
Inkonkeli zamabandla ezombusazwe lenhlanganiso ezimela abantu beZimbabwe kwele South Africa bathi ukungethulwa kwesinqumo semthathwandaba ngesikhathi sekulethe ukuhlukumezeka okukhulu kuzizalwane zeZimbabwe lezi.
Zithi inengi labeZimbabwe laba abazange bafake izicelo zamanye amapermit ngoba besazi ukuthi abalazo izinto ezifunekayo ukuze bawaphiwe. Kulaboke abafuna ukufaka izicelo sebethole kuphela imvumo yokuthi bafake izicelo zamapermit okuyinto inengi elingakayenzi.
Abalabantwana esikolo abazi kumbe babakhiphe bahle baqale ukubopha imitshaqana yabo. Abalezindlu, izimota lokunye labo abazi loba bathengise bagcine imali ezikhwameni zabo.
Umgcinishlalo wenhlanganiso elwela amalungelo abesifazana eyeZim Imbokodo, uNkosazana Victress Mathuthu, uthi nxa bekhangela isimo sabo becabanga ukuthi sekusele amalanga angamatshumi amathathu kuphela isinqumo somthwethwandaba silokhu singakaphumi bafikelwa yikwesaba okukhulu.
“So kwenza baphile bengazi ukuthi banzeni, noma bayemuva loba baya phambili. Bamile ndawonye kuleso sinqumo senkantolo njalo kunzima futhi ukuthi bahlale balinde isinqumo benga aplayanga amawaiver. So, now izinto seziyi two, uaplaya iwaiver ngapha ulinde isinqumo senkantolo. Abantu sebephila nzima abasazazi ukuthi benzani.”
Umgcinisihlalo webandla leCitizens Coalition for Change kwele South Africa, uMnumnzana Trust Ndlovu, uthi lusizi lodwa kwabeZimbabwe laba.
“Ukudileya kwejudgement kutshiya impilo zabantu ziphansi kwenselela enkulu kakhulu ngoba khona manje abantu babheke ukuthi bangahlela kanjani impilo zabo, Bese benama bank accounts, besebenabantwana abaya ezikolweni, bese benama business aregistered. Konke lokho kuzoba nzima kakhulu ukuthi kuqhubeke phansi kwengcindezi yokuthi abasavunyelwa ukuthi babe ngabahlali bakuleli lizwe.”
Umgcinisihlalo wenhlanganiso yeZimbabwe Community in South Africa, uMnumnzana Ngqabutho Mabhena, uthi impilo zabanengi vele seziqalile ukuchitheka.
“Into yokuqala abayilindileyo yikuthi uminister uthini njengoba u30 June esefika abantu belokhu bengakatholi amawaiver besa aplaya ngoba lamabhanga lawo asebhalela abantu izincwadi. Okwesibili abakulindileyo yikuthi isigwebo esizakhitshwa yinkantolo yisigwebo esizahambisana lalokho abamaZEP abakucelayo kumbe sizobachitha.”
Kodwake igqwetha elimela abanye beZimbabwe laba abaphikisana lokwesulwa kwamapermit abo, uMnumnzana Simba Chitando, uthi abeZimbabwe laba bazilungiselele ukulinda okwedlula lokhu abakucabangelayo.
“Nxa isinqumo somthethwandaba singachitha isicelo sethu sizabuyela emthethwandaba siyephikisana lesinqumo lesi.
Ugatsha lwendaba zasekhaya lona aluzange luphendule imibuzo oluyithunyelweyo ngodaba lokuthi kufanele benzeni abeZimbabwe laba njengoba selidumela emansumpeni belokhu besalinde isinqumo somthethwandaba.
Forum