JOHANNESBURG - Izizalwane zeZimbabwe bezitshengisela emahofisini ogatsha lwendaba zangaphandle kwelizwe kwele South Africa ngoLwesithathu zicela iSouth Africa ukuthi ibophe lokuthonisisa abadala inkohlakalo lokwephula amalungelo oluntu eZimbabwe.
Kugwalo lwabo abaluphe ihofisi yogatsha olubona ngobudlelwano beSouth Africa lamanye amazwe, abebetshengisela laba bathi bafuna iSouth Africa ibophe lokuthonisisa zonke iziphathamandla zikahulumende weZimbabwe ezetheswa umlandu wokuhlukuluza lokwephula amalungelo oluntu eZimbabwe.
Omunye wabebetshengisela laba, uMnu. Emmanuel Banda utshele iStudio 7 ukuthi umthethwandaba wesisekelo sombuso kweleSouth Africa wakubeka kwacaca ngo 2014 ukuthi phansi komthetho womhlaba jikelele lowakweleSouth Africa amapholisa akuleli alomlandu wokucwayisisa, ukubopha lokusa emthethwandaba abetheswa umlandu wokwephula amalungelo oluntu eZimbabwe.
“Ngibona engathi kubalulekile ngoba futhi naye umongameli weSouth Africa ngibona engathi nguye ophethe iSADC okwamanje. So siyafisa in the spirit of uOR Tambo, uMandela laboTongogara abalwela lawo mazwe akuSADC ukuthi besicela ngomusa ukuba sizwakale ma sikhala ngoba umakhelwane wayo iSouth Africa uyasihlukumeza kakhulu.”
Imbongi yeZimbabwe, uMnu. Thompson Charlie, laye obekulokhu kutshengisela uthi bafuna njalo iSouth Africa ibophe abetheswa umlandu wokuhuquluza igolide eZimbabwe kugoqela lamabhanga akweleSouth Africa okuthiwa yiwo abesemukela lokwedlulisa imali zegolide lobusela.
“Sifuna ukuthi laba bantu abenza icorruption eZimbabwe especially labo abaphume ku investigation yeGold Mafia, bonke aba involved babotshwe bangeniswe ecourt, so that they can answer for their crimes in court. Abantwana bethu eZimbabwe bayahlupheka because le imali abayibambayo ayisebenzeli muntu isebenzela iself interest.”
Umqondisi wenhlanganiso yeZimbabwe Intergrated Platform umnumnzana Ishmael Kawuzani, uthi sebebone kungcono ukunxusa eleSouth Africa ukubopha laba bantu ngoba angeke bafa babotshwa eZimbabwe.
“Kunzima ukuthi sitshele iZimbabwean government ngokuthi yiwo amasela. Yibo abatshontsha igolide. So, asingasendi isela ukuthi libambe elinye isela. Hayi lokho akuyenzi.”
AbeZimbabwe laba bathi ukuhlukunyezwa lokubotshwa kwabantu mahlayana kuqhubeka kusanda eZimbabwe ngesikhathi ilizwe lilungiselela ukhetho.
Ngemva kokuhlukunyezwa kwabantu kakhulu ekhethweni luka 2008, inhlanganiso yeSouthern Africa Litigation centre yamangalela ababephehla loludlakela emapholiseni akweleSouth Africa ngenhloso yokuthi bangangena kweleSouth Africa babotshwe.
Linhlanganiso yacina isisiya emthethwandaba ngemva kokwala kwamapholisa ukubopha laba bantu. Kulaphoke umthethwandaba wesisekelo sombuso owethula khona isinqumo sokuthi iSouth Africa kufanele ibabambe ibathonisise laba bantu.
Kodwake ingcitshi kwezemithetho njalo eligqwetha umnumnzana Vusumuzi Sibanda uthi kusasekhona okufanele kwenziwe ngabebetshengisela laba ukuze iSouth Africa ibe legunya lokuthatha amanyathelo ngesicelo sabo.
Kusho ukuthi okokuqala nje okufanele bakwenze yikuthi bayevula icala, balivulele abantu abathile ukuze kuthi labo bantu nxa befika lapha kuthiwe kulecala elivuliweyo. Nabo babone nobufakazi ngoba uma kubotshwa umuntu kubakhona izinsolo ezithile njalo ezikhomba ukuthi ma umuntu ebhekile kungaba khona icala lapho. Hayinje kuphela ukuthi umuntu athi uyacabangela besekusiba yikuthi umuntu uyabotshwa.”
Umqondisi wogatsha olubona ngobudlelwano beSouth Africa lamanye amazwe, uMnu. Livhuwani Tommy Makhode, uthumele isiphathamandla sehofisi yakhe ukwemukela ugwalo lwabebetshengisela laba wathembisa ukuthi bazaluphendula ngemva kokulukhangelisisa.
Forum