BULAWAYO - Ikhansili yakoBulawayo, esebenzelana lenkampani ye-TTI Parking Solutions, bakhangelele ukusungula uhlelo lokupaka izimota enzikini yedolobho lapho abanikazi bezimota abalakho ukukhokha imali efika phose ikhulu lamadollar – US$90 ngenyanga.
Lokhu sokucaphule abanye abalezimota abathi kabasoze benelise ukuhlawula imali enengi kangaka eyokupaka izimota.
Kukhangelelwe ukuba kuzakuba lenhlelo ezigoqela amakhadi abalisa elePlatinum, eleGold leSilver, awokupaka imota kusukela ngoNhlangula. Kusigaba sePlatinum, umtshayeli wemota uzakhokha amadola phose alikhulu ngenyanga okuzakwenza ukuba apake santando edolobheni leli. Phansi kwesigaba seGold, umtshayeli uzahlawula amatshumi amahlanu amadollar eMelika – US$50 ukupaka santando okwamaviki amabili kuthi njalo ukupaka iviki yonke phansi kwekhadi leSilver kuzabiza amatshumi amathathu amadola eMelika – US$30.
Okwamanje abatshayeli bezimota bahlawuliswa idola leMelika ukupaka izimota okwehola elilodwa. Abantu bayakusola lokhu. UMnu. Meluleki Moyo, umtshayeli womtshova othwala uzulu enzikini yedolobho, uthi kabalamali yokungena kuhlelo lolu.
"Ngabe ikhansili iqale yasibuza mhlawumbe besizabonisana ngoba okwamanje kunzima izimota ziyafa lamafutha asedula njalo lemigwaqo ifile"
UMnunzana Tapiwa Nyoni ulombono ofanayo. “Ahh imali ebizwa yikhansili inengi kakhulu ayihambelani leholo njalo iyadula imithelo yabo "
Lokhu kusekelwa njalo nguMnu. Justine Nkomo. “Umthelo weZinara ngibhadala $30 ngihambe santando inyanga ezine lokhu okwe$90 ukupaka kuphela angihambisani lakho kuyadula."
UMqondisi weNational Consumer Rights Association, uMnu. Effie Ncube, uthi imali izahlawulwa kodwa ayihambelani lesimo semigwaqo.
"Okwathenjiswa abantu akwenzakalanga lokhe uhlelo lokuhlawulela ukupaka lwaqalayo nyakenye kodwa abantu bazahlawula bekhangelele ukuba imigwaqo icace."
Isikhulumi sekhansili yakoBulawayo, uNkosikazi Nesisa Mpofu, uthi kuqakathekile ukuba abantu benanzelele ukuba idolobho leli lidinga imali yokulungisa imigwaqo lokunye.
"Uhlelo lolu luyaqala kunyanga ezayo njalo kukhona okusalungiswa andubana imigwaqo layo ilungiswe ngoba okwamanje kudingakala US$700 million ukuba imigwaqo yedolobho yonke ilunge.'
Kusukela ngoNhlolanja nyakenye, ikhansili yakoBulawayo yamanyana lenkampani yeTTI Parking Solutions ukuhlawulisa abatshayeli ukupaka izimota enzikini yedolobho idola elilodwa leMelika okuyinto engayamukelekanga ngoba abatshayeli labosomabhizimusi bethi kubulala amabhizimusi njalo kuyadla esambeni.