Matebeleland North.............
Inhlanganiso ezimeleyo eye Children in the Wilderness ngoLwesihlanu inikeze izikolo ezedlula ezingamatshumi amane-40, zesigabeni seMatabeland North, isipho samabhuku aphathelane lokulondolozwa kwezemvelo lezinyamazana zasendle.
Lesisipho sibuye kulandela ukunanzelela ukuthi intsha yalamuhla kayilalwazi olujulileyo ngokuqakatheka kokulondoloza imvelo.
Ekhuluma emkhosini wanamhlanje, uNkosikazi uSue Goately ugcizelele kakhulu emazwini okuthi intsha yalamuhla kubalulekile ukuthi ifundise ngezokulondoloza njengoba kuyizo inkokheli zakusasa.
Amabhuku la, uthi labo bawathole njengesipho esivele enhlanganisweni yaseMelika, eye Books For Africa besebenzisana labohlangothi lukahulumende olubona ngenhlelo zentuthuko olweUSAID.
“Silesikhathi sisebenzisana labo okwamanje sebesilethele ingwalo ezingafika phose ikhulu lasikhombisa -170 000 esesiwanikeze izikolo kwele Matabeleland North kusukela eTsholotsho, eLupane sizobamba eVictoria Falls.”
UNkosikazi Goately uthi inani labantwana esabelweni lesi kabafinyelelei iziphala zamabhuku, ama Library, okuyikho okubangela ukuthi uhlupho lobuyanga luqhubekele phambili.
“Lokhu sikubona kuqakathekile ngoba nxa umntwana esenelisa ukubala, beyayenelisa ukuzwisisa kakhulu ngabakufundiswayo ngakho sibona ukuhlanganela lokhu kuphakamisa imfundo okuyikho okulangathelelwa ngabe ZIMPARKS kanye lomhlaba wonke ngezokulondoloza.”
Kumpumela ye Zimbabwe School Examination Council yomnyaka ka 2022 kwabahale imihloliso kaForm 4, izikolo ezilitshumi lasitshiyagalolunye esabelweni seBinga zaswela ngitsho loyedwa umntwana owaphumelelayo ukuthola imiklomelo yokuqhubeka ukuya kuform 5.
Abe Zimbabwe Vulnerability Assessment Committee bakusekela lokhu ngokubika ukuthi isilinganiso sabantu abafika amatshumi amahlanu lantathu ekhulwini-53%, eMatabeleland North liphelela kumfundo eyePrimary, okwenza lindawo ibesezingeni eliphansi kwezentuthuko kulezinye izabelo elizweni lonke jikelele.
Oyamukele ingxenye yalesisipho samabhuku,uMnumzana Amos Gwema ongomunye wabasebenzela uhlangothi lwe Zimbabwe Parks And Wildlife Management Authority uthi lokhu kuyabongeka ngoba lakho lokhu kuyaqinisa ubudlelwano bezakhamizi labo.
“Ngokwenza lokhu sizabe sivala isikhala sokuthi izakhamizi zibesazi ukuze benelise ukusibikela okwenzakala ngezemvelo endaweni zabo. Umzekeliso walokhu yikuthi ababulala inyamazana bengathumba lindawo, balakho ukusibikela ngoba bazabesebesazi ngalezi ingwalo.”
Izikolo ezabalwe lesi sipho ngezingcelezalane le Hwange le Chizarira National Parks emangweni weBinga.