HARARE - UMongameli Emmerson Mnangagwa uselubhekise kwele Bhilithane elanda umkhosi wokugcotshwa kweNkosi uKing Charles III, okukhangelelwe ukuba kuzakwenziwa ngoMgqibelo.
Uhambo lwakhe lwenzakala ngesikhathi abakunhlanganiso yeUnited Kingdom Parliamentary Group on Zimbabwe besithi akumelanga uMnangagwa ahambe emkhosini lo.
Ezinye ingcitshi ezicubungula ezombusazwe labamabandla ezombusazwe bathi lokhu kuveza ukuba uhlelo lukahulumende olukukhumisana umlotha lamazwe womhlaba, olwe re-engagement luyaphumelela kodwa kulabanye njalo abathi lokhu akutsho lutho.
Amalunga edale leBhilithane akunhlanganiso yeUnited Kingdom All Parliamentary Party Group Zimbabwe asanda kuluba incwadi ekhonona ngokuthi uMnangagwa unxuswe emkhosini lo yena esephula ilungelo loluntu eZimbabwe.
UMnu Alfious Mapuranga, unobhala webandla leUnited African National Council njalo ekumanyano wePolitical Actors Dialogue, ngomunye wabathi uhambo lolu luveza ukuphumelela kohlelo lweZimbabwe lokuvuselela ubudlelwano lamazwe womhlaba.
“Ngokunye okutshengisa ukuba kuminyaka emihlanu besizama ukusebenza njenge POLAD ukuba sikhulumisane lamanye amazwe.”
Lokhu kusekelwe nguMnu. Mabutho Moyo okudale Central Committee kubandla leZANU PF.
“Uhambo lolu luveza sobala ukuba uMongameli Mnangagwa uzimisele ukulungisa ubudlelwano beZimbabwe lamanye amazwe.”
Kodwa umsekeli wesikhulumeli seCitizens Coalition for Change, uMnu. Gift Ostallos Siziba, uthi uhambo lolu alusizi eleZimbabwe nxa lingalungisi okuhluphayo kuleli.
“Lokhu kuyaveza ukuba kwele Zimbabwe kulodubo ngokuhlonitshwa kwamalungelo kazulu. Uhulumende uncindezela abantu abatshiyeneyo ikakhulu labo abakhuluma ngesimo selizwe.”
Isikhulumeli seZAPU, uMnu. Msongelwa Ndlovu, uthi kumele uhulumende alungise okunengi ukuze amukeleke.
“Okwenzakalayo lokhu thina asikuboni ukuba kuzasincedi ngoba vele akula okuphumayo nxa sikhanegela uhambo luka Mnangagwa.”
INkosi uCharles III, ugcotshwa ukuthatha isihlalo sobukhosi ngoMgqibelo kulandela ukutshiywa kwazo singela muntu ngemva kokubhubha kuka nina iNdlovukazi uQueen Elizabeth II.
Abazabe besemkhosini wokugcotshwa kweNkosi entsha bagoqela inkokheli yamazwe womhlaba osomabhizimusi lozulu weNgilande.