BULAWAYO.......................
I-Zimbabwe imanyene lamanye amazwe womhlaba ukunanza ilanga lezisebenzi, ele International Workers Day lapho uBulawayo abuthane enkundleni eyeSmall City Hall. Izisebenzi zikhala ngokuthi zifuna abaqhatshi okugoqela uhulumende ukuba babaholise ngedola leMelika.
Umsekeli womkhokheli wenhlanganiso eye zisebenzi Zimbabwe Congress of Trade Union, uMnu Chipamaunga Runesu obesembuthanweni waNgoMvulo ufakaza kabanzi ngalokhu.
“Thina njengezisebenzi sesifuna ukuba uhulumende labobonke abaqhatshi basiholise idola lemelika ukuze senelise ukuphila kungela bunzima esihlangana labo kulezi insuku obokuthi imali esiyiholayo ayisasiphilisi kodwa sisebenza."
UMgcinisihlalo weZCTU Western Region, uMnu Ambrose Sibindi uvumelane loRunesu ethi ledale lephalamende sekumele libaphe isihlalo esizabesikhangela iholo lamalungelo ezisebenzi.
"Sesikhangelele ukuba siqale ukuhola idola lemelika ukuze siphile kuhle njengezisebenzi njalo sikhangelele ukuba idale lephalamende liguqule umthetho ozavumela ukuba lathi sibelabasimeleayo njengezisebenzi edale lephalamende ngoba okwamanje idale alilamuntu omela izisebenzi yikho utholana kungumathanda ekwephulweni amalungelo ezisebenzi sikhangela lendaba yeholo."
UNkosikazi Mazvita Chinyoka omela izisebenzi kugatsha lukahulumende koBulawayo uthi bakhangelele ukuthi kusiyafika umnyaka ka2030 kube lenguquko enkulu kunhlalakahle yezisebenzi.
"Senza konke okusemandleni ethu njengohulumende ukumela izisebenzi yikho lohulumende esephume lomcijo wokuthi kusiyafika umnyaka ka2030 zonke izisebenzi zingasela bunzima zisebenza kuhle ukuze ezweni kubelentuthuko."
UShingai Chinara omele iTeachers Union koBulawayo uthi uhulumende kumele athuthukise iholo labo.
"Njengomsebenzi ngikhangelele ukuba uhulumende asiholise imali ethengayo senelise ukuthi lathi sithengele imuli zethu ukudla ngoba okwamanje kunzima ukuphila usebenza ungela olunye ulutho omele uluthengise ukuze uphile lemuli lakho loba kunjalo kunzima kithi."
UMnu Mandla Sibandla umabhalane jikelele we Cement Lime Allied Workers of Zimbabwe yena ukhala ngenkohlakalo athi isibulele ilizwe.
"Indikimba yethu yalonyaka isobala sithi thina asifuni corruprtion, ubuyanga loncindezelo olubhekiswe kuzisebenzi njalo sonke sivumelana ukuba sesifuna ukuhola idola leMelika hatshi eyakuleli ngoba ayisasenelisi njengezisebenzi."
USenator Tholakele Khumalo uthi omama bathwele nzima kulezi insuku ngoba abantu abangasebenziyo bakhangelwa ngomama.
"Udubo olukhona ezweni olubhekane lezisebenzi luhlukuluza omama ikhakhulu ngoba abantwana labobaba abangasebenziyo bonke bacina bekhangelwa ngumama. Sifuna abantu balizwisise ilanga lalamhlanje amalunga edale kumele bayekhuluma ngokudubeka kwabantu ngoba lepension eholwa linengi ayisathengi lutho izinto zonke zikhwelile. Kuyamangaza ukuthi izisebenzi zeNASSA yizo ezihola imali enengi kuthi abantu abahola ipension behola imali engathengiyo kubuhlungu kumuntu ongumama."
Ilanga lezisebenzi lonyaka linanzwa ngaphansi kwendikimba ethi "Workers Demand an Inclusive Zimbabwe free from Poverty , Corruption and Oppression." Inhlanganiso yeZimbabwe Statistical Authority ithi ezweni abantu abaphose bafike izigidi ezintathu 2,8 million abalamisebenzi.
Embnikweni wakhe wokunanza ilanga lezisebenzi uMongameli Emmerson Mnangagwa ubike ukuba kuqakathekile ukuba iholo lezisebenzi libe ngelilohlonzi. Okwamanje ezweni izisebenzi zikaholumende lezamankampani azimele bathola iholo ngedola leMelika ihlangene ledola leZimbabwe.
