BULAWAYO...........Uhulumende lezisebenzi zakhe bebathe gwaqa ehlanganweni wokuxoxisana ngokwengezelela iholo ngeRTGS kanye lemali yeCovid isuka kumakhulu amabili amadola eMelika-US$200 isiya kumakhulu amabili lengxenye amadola-US$250.
Lumhlangano ubuphakathi kweziphathamandla zikahulumende, abameli benhlangothi ezitsheyeneyo zenhlanganiso zezisebenzi kanye lasebathatha umhlala phansi bekhulumisana ngokwengezelela iholo labo.
Unkosikazi Mellisa Tshuma omunye wababalisi uthi laloba ifakiwe leyo mali akulamehluko ngoba intengo zempahla ezimqoka zikhuphukile.
“Akulalutho abalwenzileyo njengoba imali iyathi isizile ithole ulutho solukhwelile amarates ayale amabasics akhuphukile iprice uyazibuza ukuthi emsebenzini uyahamba unjani into yonke ikhwelile we are back to square one.”
Umnunzana Ekel Ncube umngcisikhwama wenhlanganiso yababalisi eye Zimbabwe National Educators Union uthi ukuvulwa kwezikolo sokungehlula ngenxa yokungeneli kwemali.
“Ama Teachers this month baphiwe i250usd nxa ukhangela i$1260 indifference yakhona inkulu kakhulu.Kunzima kakhulu ukuthi amateachers attend ama lessons abo especially nxa ukhangele amafees abalabantwana abaya kumaboarding schools I cheapest yi$500 ezinye $800, kuyatshengisa ukuthi amafees otitsha abasoze bekwanise ukuthi bewabhadale. Usuku lomhlaka 8 May bazaba lobunzima kakhulu ukuthi bebuyele emsebenzini especially abagadayo even ibond aliyenzi difference ngenxa yamaprices akhwelayo,khathesi irate i around 2000 per USD1.”
Umnumzana Charles Chinosengwa owenhlanganiso eye Zimbabwe National Educators Unions ukhuluma ngempumela yenkulumo zaNgoLwesihlanu.
“Simangaliswa yikwenza kukahulumende ngoba abakhulumisani lathi kodwa sebesitshela okokwenza. Iholo leli elikhulunywe nguhulumende asilo ebesilifuna njalo kwenziwe kungela kukhulumisana.”
Inhlanganiso eye zisebenzi zikahulumende eye Zimbabwe Confederation of Public Sector Trade Unions isithe kufanele ingxoxo ezehlandla lesibili kumele ziqale ngokuphangisa ngoba iholo elengezwe ekucineni seligugudwe yikuqansa kwentengo yempahla. Imibono yezisebenzi ikhangelelwe ukukhitshwa kungakadluli insuku eziyisikhombisa.
Imizamo yokuthola imibono yompathintambo obona ngezisebenzi umnumzana Paul Mavima, loba unobhala wePublic Service Commission, uDoctor Rosemary Tsitsi Choruma yehlule.
Kodwa encwadini elotshelwe ingatsha ezehlukeneyo zikahulumende uDoctor Choruma wazise ukuba uhulumende wengezelele izisebenzi zakhe iholo ngesilinganiso sokuphethwe Kabili emalini eziyithola ngemali yelizweni eyamaRTG’s kanye lemali zama allowance ezigoqela leyeCovid Allowance isuka kumakhulu amabili amadola eMelika isiya kumakhulu amabili lengxenye(US$200 isiya kuUS$250). Kuti labo abakupension bona bethola amadola alikhulu eMelika-US$100 efakwa kumaNostro Accounts phezu kwaleyo abayithola ngedola le Zimbabwe.
