BULAWAYO - Ibandla eliphikisayo eleCitizens Coalition for Change namuhla lingene kusuku lwesibili lokucubungula amagama amalunga ebandla leli, asanda kukhethwa nguzulu phansi kohlelo lweConsensus Candidates Selection Process, abafisa ukuncintisa kukhetho lwamakhansila lamalunga edale lephalamende oluzaqhutshwa lonyaka.
Luqhubekela phambili uhlelo lokukhetha amalunga ebandla leCCC abafisa ukungena kukhetho olukhulu oluzakwenziwa ngoNtulikazi kumbe ngoNcwabakazi lonyaka. lsikhulumi sebandla leCCC koBulawayo, uMnu. Swithern Chirowodza, uthi luqhubeka kahle uhlelo lolu koBulawayo.
UNkosazana Thokozani Khuphe, ilunga leCCC, obesamukela incwadi zokuhluza amagama amalunga ebandla lelu esigabeni seUmguza, uchasisa kabanzi ngohlelo lolu.
Elinye njalo ilunga leCCC, uMnu. Gideon Shoko, obesamukela incwadi ezifanayo koBulawayo, uthi uhlelo lolu lulakho ukugqitshwa namuhla koBulawayo.
Obesamukela incwadi zamalunga eCCC eMatobo, uMnu. Abednicho Bhebhe, lapho abakhona baphutshe kahle uhlelo lolu.
Isakhamuzi sakoBulawayo, uMnu. Nkululeko Mthupha, usola indlela ibandla leCCC eliqhuba ngayo uhlelo lokukhetha amalunga azabamela kukhetho lokudinga amalunga edale lephalamende lamakhansila.
Ibandla leCCC lakhethe ukusebenzisa uhlelo lweCitizens Community Consensus Candidate Selection Procedure kulokuthi kwenziwe ukhetho lwama primaries. KoBulawayo kulezigaba ezilitshumi lambili leziqinti ezingamatshumi amabili lasificamunwe munye.