JOHANNESBURG - Kuqalile ngoLwesibili emthethwandaba wePretoria High Court ukwahlulelwa kodaba lokwesulwa kwamapermit ezizalwane zeZimbabwe, eziphose zifike izinkulungwane ezingamakhulu amabili
Omahluli bedale lePretoria High Court baqale ngokulalela impikiswano yenhlanganiso yeHelen Suzman Foundation, eyiyo ehamba phambili kulabo abaphikisa ukwesulwa kwamapermit la. Amagqwetha ale inhlanganiso atshele omahluli abathonisa loludaba enhlelweni lokuxhumana lwe-Internet ukuthi ukumiswa kwala amapermit kwenziwa ngendlela engekho emthethweni.
Linhlanganiso ithi abeZimbabwe laba akuzange kukhulunyiswane labo lesi sinqumo singakathathwa. Bathi nxa amapermit la engesulwa, abeZimbabwe laba bazathwala amagabha avuzayo njengoba sebakhile kwele South Africa, sebezicandele impilo, imisebenzi, izimuli lezinye indlela zokuphila. Okunhlanganiso yeHelen Suzman Foundation, uNkosikazi Divashnee Naidoo ocindezelwe loludaba lungakaqali emthethwandaba, uchaza esinye sezizatho asenza baphikise ukwesulwa kwamapermiti la.
“Kulaba bantu kulabantwana oselokhu bazalwayo abangakaze baye eZimbabwe kodwa khathesi sekuthiwa bayephila khona.”
Amalunga enhlanganiso yeOperation Dudula, abatshayeli bamaroli lezinye inhlanganiso, bebekhona emthethwandaba besithi basekela ngokugcweleyo inyathelo likahulumende lokwesula amapermit la. Unobhala wenhlanganiso yeOperation Dudula, uNkosazana Zandile Dabula, uthe abeZimbabwe laba abasafuneki kwele South Africa.
“Bathatha imisebenzi yama South Africans. Abalethi any special skill. Basebenza babe ngabo driver bamatruck and yet akusi special skill. Kungathathwa umuntu weSouth Africa adrive but because bona bayaba exploiter laba bantu umuntu wangaphandle uyakhona ukusettler loba less than R1000 per month but because umuntu wala eSouth Africa umthetho uthi kumele abhadalwe R5000, but bona bayakwazi ukuthatha a less amount. Yikho sithi bamosha isystem yethu nje as a whole. They must go home bayelungisa inkinga zabo emakhaya.”
Umgcinisihlalo wenhlanganiso yeSisonke People’s Forum, uMnu. Zweli Ndaba, uthi labo basekela ukuthi amapermit la esulwe.
“Noma ngabe laba bantu banamapermit angeke bazi ukuphila ngaphansi kwabantu baseSouth Africa bengasebenzi. Abantu baseSoputh Africa they own the rivers and the mountains. Abantu baseSouth Africa yibo akufanele bezekuqala.”
Kodwa isizalwane seZimbabwe, uNkosikazi Nosisa Tshuma, uthi abakazimiseli ukubuyela eZimbabwe.
“Mina njengeZEP holder ngikhangelele indaba ezimnandi uma icourt case iphela. Indaba ezifana lokuthi thina sonke esilamaZEP lawa ase expiyile sisuswe kule ZEP sinikezwe amapermanent residence. Lokhu kungaba zindaba ezingasijabulisa lathi sibe kwazi ukuthi singobani njalo siyaphi. Kumanje impilo zethu zistakile asazi ukuthi siyaphambili loba emuva loba siyeqala phansi impilole esasiyibalekele emakhaya.”
Udaba lwamapermit lolu kukhangelelwe ukuthi luqhubeke emthethwandaba kuze kube ngoLwesihlanu. Inhlanganiso yeConsortium for Refugees and Migrants in South Africa, eyeziphepheli, eyeZimbabwe Exemption Permit holders Association, leye African Armit lazo zizakwethula ukuphikisa kwazo isinqumo sokwesulwa kwamapermit la.
EyeTruck Drivers’ Association yona layo isemthethwandaba isekela ukwesulwa kwamapermitila. Kulabadabuka eZimbabwe abafika phose inkulungwane ezingamakhulu amabili – 178,000 abalamaphepha la.